وانا قلبي كان عايش كطير
بيلف كون أخضر جميل
رغم النهايه المُحزنه
رغم الرحيل
رغم الوجع خطوة عذاب
مشوارها يمكن ألف ميل
روحي الغريقه ف موج هموم
ماسكه ف حبال المُحتمل
رغم الأمل .. شئ مستحيل
م انا أصلي باقي ع الوعود
مربوط ف عهدي للهوى
وبرغم قلبي اللي اتكوى
مخلص قوي رغم العذاب
لسّاني بفتح للشروق
ميت ألف باب
يا حبيبتي إيه معنى الغياب
غير قلب قاعد ع الرصيف
كما شيخ عجوز ضهرُه انحنى
ليه النهايه المُحزنه ؟
وانا كُنتلك شلال فرح
لو يسعدك إنّي انجرح
أنا مستعد أموت قتيل
لكن بلاش يبقى الرحيل
هوّ اختيارك للعقاب
معنى الغياب
إني أعيش عمري ف نارين
نار الفُراق والإنكسار
والتانيه نار قلبي الحزين
ومافيش يا روح الروح عقاب
على ذنب واحد مرتين
وان كانلي ذنب وما اعرفوش
ف الحُب تطهير للذنوب
وانا قلبي داب ف الحُب دوب
وحياة هواكي اللي انكتب
على قلبي نار
وحياة غرامي اللي ما يوم
لمسُه الغُبار
أنا ف الغرام مخلص قوي
وطريقي ف الحُب الوفا
ليه تحرميني من الدفا
وتطوحيني بطول دراعك
ف الجليد
أنا قلبي عمره ما كان حديد
مع إنه كان قبل الغرام
مخلوق عنيد
من يوم ما شافك وابتدا
يفرح قوي بشكله الجديد
وما عادش يجري ف الوريد
غيرك وبس
قلبي اللي فيكي ارتاح قوي
قلبي اللي بيكي ف لحظه حس
محتاج تمدّي الإيد بشمس
وتطبطبي على قلب مات
من يوم ما قررتي تسيبيه
محتاج حبيبتي تحضنيه
وتعيدي نبضه للحياه
سيد منيرعطيه