هنا بغداد
هنا الكوفه
هنا البصره
هنا العزه ف عهد هارون
وصبحت بين إيدينا اليوم
ف عصر العجز منكسره
هنا معاويه
هنا سوريا 
حلب ودمشق
نزار صاحب حالات العشق
وبرضه اليوم على إيدنا
أفاعي كتير ف قلب الشق
تبُخ السم ف الخُضره
هنا ليبيا
هنا طرابلس وبني غازي
هنا المختار
هنا الجار اللي صار مش جار
هنا الزمن اللي وقت ما دار
نزف دم الولاد حسره
هنا فلسطين
هنا غزه
هنا الأقصى
جريح لكن بيستعصى
ورافض يرفع الرايه 
قُصاد صهيون
هنا طعم الوجع ملعون
وحاجه ف حلقنا مُرّه
غريبه القصّه بالمره
بنبكي أخونا ف فلسطين
ونقتل اخونا ف البصره ؟
وف الموصل
وأرض الشام
أسود لكن بقينا نَعام
وكنّا زمان ..
بنرفع راية العزة
رمانا الريح بميت هزّه
ف طارت مننا الرايه
وجيبنا مكانها ميت رايه
بألوان الهوان والذُل
ميزان الحكمه فينا اختل
عشان نور الأيمان فينا
على أيدينا صبح مُعتل
ف أصبحنا بلا معنى
بلا تواريخ
بلا أسماء
نعالج داء ونزرع داء
وبعد ما صوتنا كان عالي
بقى صوتنا على استحياء
ننادي بصورة استجداء
ف أصبحنا كما لعبه
بيتسلّى العدو بينا
ويرمينا ف سنين صعبه
عشان ليبيا
عشان بغداد
عشان القدس ويّا الشام
بيبكي بلال 
على الكعبه
سيد منيرعطيه