-- انا قاعد
-- على الدكة
-- و فرع التوتة يتمايل
-- و يتباعد
-- على السكة
-- و ست كبيرة مسئولة
-- و طفلة من بعيد هلة
-- مع اصحابها بتتسلى
-- و تحكيلهم
-- حكاية امنا الغولة
-- و انا عاشق
-- و بحلم شمعتى تنقاد
-- حبيبى بعيد
-- و بينى و بين بلاده بلاد
-- و فرحة عمر محصورة 
-- ف كلمة منه او صورة
-- باكلمها
-- و اناجيها
-- اناجى نسمة بردانة
-- احاكى نجمة سهرانة
-- اناجى طيف
-- ف ليلة صيف
-- ينام الناس 
-- ف ليلة البدر عنها غاب
-- عن الابواب
-- و انا سهران
-- و بارسم للامل ضحكة
-- و باعزف للفرح الحان
-- لكن هيا
-- ف جنتها
-- ف ملكوتها
-- طب اسكت ليه
-- لانا عاجز ولا مشلول
-- انا عاقل
-- انا مسئول
-- سفينة راسية ع المينا
-- خدينا
-- روحى للمحبوب
-- هنا مكتوب
-- ف قلبى و اتوشم حبه
-- قدر مكتوب
-- جبل عالى
-- عليه القصر
-- و يومها العصر
-- انا ع الباب
-- عنيه تلمح الغالية
-- تجلت قدرته فيها
-- و ربك بالجمال فيها
-- مكفيها 
-- عطاها الحسن و اتوصى
-- و هى من بعيد جية
-- ولا حسة
-- بدمعة ع الخدود جارية
-- و كان الحضن مستنى 
-- على ايديه
-- و شايلها
-- اطير بيها
-- و اتملى جمال البدر
-- ف عنيها
-- جدايل ليل طويل ضلمة
-- و بسمة تخجل المجنون
-- و همسة تفتن الزاهد
-- و نظرة تسحر الساحر
-- و انا ساحر
-- و مش قادر
-- اواجه حسنها النادر
-- قالت لى سيدى مولاى
-- انا طوعك
-- و ملك ايديك
-- تعال عيونى ف عيونك
-- اكلمها و اناجي الورد ف خدودك
-- فتحت عنيه من تانى
-- لقيت نفسى..........
-- لقيت نفسى 
-- و انا قاعد على الدكة
-- و فرع التوتة يتمايل
-- و يتباعد
-- على السكة
-- و ست كبيرة مسئولة
-- و طفلة من بعيد هلة
-- مع اصحابها بتتسلى
-- و تحكيلهم
-- حكاية امنا الغولة