ولا عادشى ...
منديلى قادر...
على مسح الضلام
ولا فيه بقايا لمسح
تباريح السفر
فخرجت من توبى
سبت اللى باقى ف جتتى
يحرس منامى فى السرير
والروح ...تلف الكون
بتدور
على شربة مية ...ف قعر البير
وتعود الروح بملامح
صورتى المهزومة
تتهزالمية ف وش البير
تغرق صورتى ف قعر الحدوتة
وتكـَـوّن صورة جديدة
على التوتة
صورة فارس
مكسور سيفه
بيحارب أباليس الإنس
بس خسارة
التوتة... .شاربة من البير
ورجـعِـت جتة روح مكسورة
لـِبـِست لحمى
وبواقى عضمى
سكنـِت جنبى
فى حوارى قلبى
أصل ما عادشى ف بيتى
سرير
والمنديل..لسـّاه
مش قادر يمسح
غير صورتى
من قعر البير
صوت المية فزعنى كتير
مع إن البير
ناشف ريقه
نمت...
قمت ...
مش لاقى الصورة
غير خيالات
على طعم خطاوى المشاوير
............
بـــقـــلــــــم ا لـــشــــا عــــــــر
أ بـــــو عـــمــــــــا ر ا لـــمــــصــــــر ى