مصري يا مصري بقولك إيه
إنتا يا فندي و إنتا يا بيه
مهما ان كنت فقير أو رايق
أكلك برضه لا يعلا عليه
عارف ليه ؟
علشان مهما ان كانت حالتك
مهما تنوع سفرة أكلك
يفضل حب الفول من طابعك
لو يوم غاب هاتحن إليه
قدرة عفية و فيها الفول
و البياع يغرف علطول
و ان فاتك أنا مش مسئول
إلحق سمي و مزمز فيه
لو بالزيت يشفي العيان
أو بالزبدة البلدي جنان
أو بطماطم حط كمان
خل لمون و طحينه عليه
و فرمضان
و فرمضان تتسحر بيه
و انسى الجوع و الصوم هايكون
سهل و يومك في المضمون
أصل الفول عجمية طرية
و الهداف من غير الفول
عمره ما يعرف سكة جون
و اللي مسافر برا يحن
بيكون هايم في الأشواق
كل شويه مزاجه يزن
و يقول يا مدمس مشتاق
ربي يبارك فيك يا حنون
ياللي مافيش زيك في الكون
بس يا فول بالراحة علينا
و بلاش توجع في القولون