لمّا قلمي يحس إنُّه
إتملا من دم روحي
يضحك الضحكه الغريبه
فوق سطور ورق التاريخ
يبقى جن عايزله شيخ
يهزي بالعبارات ويرقص
رقصة الطير المفرفر
بس عز الجرح يكتب
حرف مسك وحرف عنبر
أصل قلمي ف عز وجعه
ع الوجع قادر يعبّر
تعبيرات جايز غبيّه
إنما فيها الإفاده
قلمي م الأخر ياساده
عبقري ف وصف الألام

عنده إحساس الكلام
ترمومتر حراره قادر
يحسب الدرجات بدقّه
قلمي لما تبان دموعه
ع الورق يكتب بحُرقه
بس لأه ...
مش ح يرضى القهر تاني
مش ح يقبل بالمهانه
مش ح يرضى يعيش يعاني
غدر معدوم الأمانه
قلمي ح يدوس ع الخيانه
رح يغيّر خط سير
بس ف الأول ح يكتب
قصة الغدر الحقير
لجل منها الكل يعرف
معنى جرح الغدر لمّا

يدخل القلب الكبير
بعدها رح يرمي وجعه
جوّه كهف الذكريات
رح يغيّر دم حبره
من تراب كل اللي فات
بعدها يكتب مشاعره
إنما ...
على صفحه بيضا
بقلم/ سيد منيرعطيه