قلبى المجنون
لساه بيدور علي وطن
لساه بيعافر ..ويشاكس
والوطن التايه.... فى ملامحه
جواه ساكن
ليه قلبى مش واخد باله ؟
ولا يكونشى المر الطافح
من شرايينه
خلاه مش شايف قدامه
واشاور له عليكى
وامسك إيده
والمس بيها
حبابى عنيكى
يلمس وجعه ...
ولا هوش حاسس
وادخل جواه ...
أفتشه
واهمس له بإسمك
أوشوشه واغششه
ولا شايف غير تعبه معاكى
ويحب زيادة ف لياليكى
ما هو رغم عذابه وكل شقاه
لساه حبك
لساه عاشقك
ما انت الحضن وانت السكن
والحب فيكى يعنى
وطن
حبك وطن ...جوايا حىّ
حبك وريد ونبض قلب
حبك فى عينى
أحلى ضىّ
سيبى النهار يشرق فى كفك
شاورى بهمسة شوق ونور
تلقى القلوب واقفين طابور
ويعدوا لاجلك
ألف سور
ويشربوا ملح البحور
بس انت تتعافى
وامشى على رموش عينى
حافى
تلقينى جاى لك
بشوقى طاير
واغزل بعمرى ليكى الضفاير
وافرش غرامك فى كل دار
وارسم عيونك فى كل حىّ
بس انت قومى
............
بــقــلـــم ا لـــشـــــا عـــــــــر
أ بــــو عـــمــــــا ر ا لـــمـــصـــــــر ى