يا بحر مال موجك..ثاير وحاير ليه
ولا..ده اصله دمعك..قوللى بتبكى ليه
عشان حبيب غادر..سابك وراح سافر
ولا دموعك ع اللى..جنبك ومش فاكر
يابحر قوللى ليه..إيه بتبكى عليه
عمال تناجى الشط..رايح وجاى تلاغيه
وشراعى عمره ماحط..مش لاقى مرسى ليه
بحسب دموعك ليا..وحالى صعب عليك
واتارى دمع عنيا..يابحر داللى مليك
يابحر بوح لى بسرك..يعنى ح اقوله لمين
ف قلبى ياما بدارى..انا وانت مساكين
لا النجم دليل راضى..يهدينى برك فين
وحتى البر قصادى..وتايهة عنه العين
انا وانت كدة ح نفضل..نستنى ف اللى ماجاش
وندانا عمره مايوصل..وعذابنا كله بلاش
والموج يصرخ كفاية..الرمل ساب اصدافه
وانا همى جوايا..لاحد سمع ولا شافه
يابحر قوللى ليه..إيه بتبكى عليه