نزلت بحر الهوى
زعل الهوى منى
جرحنى فين الدوا
وصابنى فى الننى
--------------------
مشيت مع المية
قابلتنى بلطية
قالتلى جانى الهوى
وسكنته فى عينيا
---------------------
فينك بقالى زمان
بدور على قلبك
عشت سنين حرمان
كان نفسى يوم اقابلك
--------------------------
اليوم بقينا سوى
جمعنى بيك الهوى
اياك تروح لبعيد
كفاية قلبى انكوى
----------------------
هوايا فى عيونك
والرمش ساحرنى
الننى فى جفونك
عاشقاه وراسمنى
----------------------
صورتى لقيتها معاك
ولايوم انا شفتك
قلبى داب فى هواك
وتملى انا فى سيرتك
------------------------
وف لحظة مش ع البال
لقيت انا طيفك
مرسوم فى رسم خيال
شتايا وانا صيفك
--------------------
شتاك نزل امطار
سيول كانه اعصار
ضمتنى باحضانك
فكرى معاك احتار
---------------------
ربيعى غار منك
بستانى جاب ازهار
لا عرفت اروح عنك
ولا لى خيار اختار
--------------------
اخترت اعوم حواليك
وتضمنى بايدك
نسرح فى دنيا الهوى
نفسى بس ارضيك
--------------------------
انا عشت حلم جميل
ولسه بحلم بيك
اياك تقول تمثيل
انا روحى دايبه فيك
---------------------
رجعت معاك روحى
والميه شاهده عليك
لو قلت لى روحى
اروح ابات فى عينيك
===========