<!--

<!--<!--<!--

ولأني معجون بالوجع

ب اضحك كتير

واشرب مرار الأه عصير

جايز تجيب الشمس نور

جايز تغيّرلي المصير

م انا ليّا يمكن كام سنه

ماشي ف بلاد الشوق عذاب

لا مدينه يوم فتحتلي باب

ولا نخله حدفتلي الرُطب

ولا شوفت ضل من الشجر

ولا شوفت طير

طعم المواجع شدّني

على سكّه فيها الإنكسار

ميت ألف جنّه لقيتها نار

وغيوم تعدّي تهدّني

وعليّا تشتي بالمرار

لا قدرت أخرج م الوجع

ولا قلبي بيغيّر مسار

ووصلت حد الإنهيار

ف لقيت هناك كل الصحاب

واقفين بدمعه مزيّفه

والكل معدوم الضمير

ولأني معجون بالوجع

ب اضحك كتير

جايز على الناس أجمعين

جايز على ..

 قلبي الغشيم

اللى افتكرهم أوليا

وفتح لهم كل الببان

وزرع لهم نخل الضيا

وادي النتيجه المحزنه

قطفوا النجوم

وسابولي فوق النخل بوم

ورموني ف الليل الكئيب

الكل كان ف السكّه ديب

وانا قلبي كان بينهم حَمَل

وادي السيناريو اللي اكتمل

أنا ماشي ف طريق العذاب

وقُصادي واقفين الصحاب

لكن بدمعه مزيّفه

والكل معدوم الضمير

وعشان كده

أنا رغم شلال الوجع

ب اضحك كتير

سيد منيرعطيه