حظّك ياقلبي تكون كده
محتار تملّي مابين وبين

بين ليل وحلم يضمها
أو صُبح فيه نظرة حنين

ونهار وليل شايفك كده
معكوسه فيك الدقتين

واحده تقول عايزه النهار
علشان عيونها باختصار

وقت ابتسامها ف اللُقا
قدامي تشبه جنتين

والتانيه عايزه الليل يطول
علشان تخش ف حضنها

وتدوق عسلها وشهدها
وتعيش حياة المشتاقين

خلتني ليه تايه معاك
أقعد ف أرضك أو سماك ؟

أرضك جميله مافيش جدال
وسماك خيال فوق الجمال

طب اعيش ف واقع أو خيال ؟
على قدمي واللا بجناحين ؟

محتار ياقلبي مابين وبين
عطشانه روحي للعيون

مشتاق يا حضني لضمّها
يا قلبي خايف م الجنون

يصبح طريقي ف حُبّها
ماهي مش بشر
لكن ملاك

وياها بشعر بارتباك
كان نفسي يبقالي اشتراك

ف الدنيا وافضل جنبها
ف الليل أدوق أحضان وشوق

أسكر واقول مش عايز افوق
والشمس تطلع ف الشروق

ترميلي نظره ف وقتها
وافضل كده دايما أكون

بين حُضن ليل ونهار عيون
يبقالي كون غير أي كون

ومكاني يبقى ف حُضنها
م انا م البدايه بحبّها

وانا للنهايه بحبّها
وانا ف الحكايه كلّها

عايش غرام .. ميّت حنين
محتار يا قلبي مابين وبين

بقلم/ سيــــد منيرعطيه