ويعـدّى الزمـَن الزاحـِف
ع الوشوش الدبلانين
يضحـَـــك
ويسيب علامات الضحكة
تجاعـيـد ونـُـقـَـــر
وانا شايـِف كل الناس شاخـِت
حتى المواليد
مش شايف
على وشّ حقيقتى
خطاوى الزمن التايهين
جاى يتسـَكـَّع
ويسيب علاماته على عيونى
والليل الشايب على راسى
خـَد من حـِكمـِة عقلى وفـَرَّغ
كل جنونه على جنونى
وتعدى الأيام تتسـَحـَّب
على وش الريق المرمى ف نار التباريح
والصوت مش طالع من جوفى
والهـَمّ رسـَم لى ف وشى ضـَريح
وانا شايف كل المريدين
دراويش الشـِّـعــــر
بيلفوا ......
طوَّافة عـِشق قصاد عينى
ويمـَلـِّسوا مرة عل خدودى
وكتير يتمسـَّحوا فى جبينى
ولا حـدِّش منهم . خد باله
م الدمع النار
مزروع فى خضار الضـِّحـكــة الهلكانة
ولا شافوا الليل الشايب
يتعـَــكـّـز
على فروة راسى المدقوقة
بين اكتافى
ولا حـد لـَمـَس
شبابيك القلب من بـَرَّة
لا إزاز ولا شيش
وانا واقـف بين الشعرا ..الأمرا
على شكل طاووس
مـَنـتــوف الريش
والكل بيرقـُص
على دقة تزييقـِة قلبى
والنبض الـمـُرّ المـِتـخـَبـِّـى
تحت بلاط ضلعى الدايـِب
لـسـَّاهم شايفين الفارس
ولا حـَدَّش خـَد باله م الشايب
واللى يطـوف
وبيدعى بإسم الشـِّعر
يناجى....أحـلى حــروف
واللى يمـَجـِّد ...واللى ينجـِّد
أحلى وسادة لأحلى قصيدة
واللى يفكـَّر
واللى يذكـَّر نفسه بأنه
كان ناسى ..أو مـُتـَتناسى
طـَعم شياط ريـحــة أنفاسى
ويقيموا المولد على سـَطـــرى
وجنـــازة ف صـَفـَحــات كـُرّاســـى
وانا ماسك فى حروفى وباجرى
وباحاول الـِمّ سطور عـُمرى
من كراس ما فيهوش ولا سـَطر
ويلف الواد الـتـَنـّـورة
ويلـِفـِّـنى جـوّاها ف ثانية
ويلـَفـلـِفـنـــى
أستيكة قلمى المـَمـســوحــة
لبسـِـِت تاج الحـِكمة الضـّايـِع
وبتـِحـذفـنـــى
وتتوه فى التنورة ملامحى
من ساسى ..
ولحـَدّ الشيبة ف عـَتـَبـِة راسى
وف آخر الليل
تنفـَضّ السـَّهرة مع الحـَضرة
يمشوا الدراويش
والسـِّبـَح المشنوقة ف رقابيهم
تتفـَرّط على أرض ضريحى
وانا احاول الـَمـلـِم دعاويهم
واسنـِد ع الحـَرف الساكـِن
والمـُتـَحـَرِّك ...
على خـَطـاويهم
واكـتـِـب
من آخـِر دقـِّة شـِعـر ف قلب قصيدة
يـِخـذِلنى الحرف ولا يشيلنيش
وتشـِدّ الشـَّدّة النـَبض الباقى ف تجاويفى
والفـَتحة تفـتـَّـح لى شوارع
لدخول الموت قلب قصيدتى
وحروف الجر تجـُر الروح
لحدود القبر المفتوح
فيضـُم الضمـَّة على ضلوعى
تتفـَرَّط كل حروفى
على دمـــوعـــى
وتغادرعقلى ..وجيناتى
مع تـَكوينى
ترسـِم حوالين جـتـِّـة روحى
شـَكل سنينى
تتنـَطـَّط أحلى حروف الروح
من حوالينى
تزرع شـَتـَلات شـُعـَـرا عارفهم
شايلين كل صفاتى ..ملامحى
أضـحـَــك
أشـهـَـــق
وانا راقـِـد
شايـِف آخر مشاويرى
رحلة موت موتى المفضوحة
جـوَّة قصيدة
سايبة لى جروحى المفتوحة
عايشـة ..بتحـاول تواسينى
..............
من ديوان ...حـَبــــَل القــبـــــــــور
بــقــلـــــم ا لـــشـــــا عــــــــر
أ بــــو عــــمـــــــــا ر ا لـــمــــصــــــــــر ى