فيه ناس شياكة محفلطة
قيمة و سيما متصيتة
تضحك ب رنة مزأططة
وكل خطوة متخططة 
اساتذة نفاق وحليطة
اموال بالكوم و مرطرطة
وف مية البطيخ مبلبطة 
وناس سحنتها ملخبطة 
تكشيرة ورد ب جليطة 
وعايشة حياتها ف لخبطة 
عيشتها ضنك ...وقربطة 
واللى عايشنها مرمطة 
والبؤس كاويهم محبطة
وتبات بدموعها معيطة 
ويناموا كمان من غير غطا 
ويادوب ف الدنيا متشعبطة
لا حياه ولاموت متشحططة 
واللى عايشينها قرمطة 
واخدينها عك وزروطة 
ويلف ببنت زغنططة 
سنيورة حليوة مقطقطة 
ولابس جاكتة مخططة 
وهى ببلوزة ..منقطة 
وناس بهبل مستعبطة 
ومقضينها ف العفرتة 
ولسانهم آخر فلقطة 
بلطجة بالصوت وهلفطة 
وآخرها يرسى العطا 
بزنزانة ضلمة محوطة 
بكلام للذكرى وشخبطة 
وخيبة كبيرة ...مبططة 
وناس اعصابها مشيطة 
وناس عايشة متحنطة 
موميا ف كفنها مربطة 
وناس ع الناس متنططة 
فارس وعلى مهره إمتطى 
وناس ملهاش ف المطمطة 
وناس ف بحر الاذى مغوطة 
وناس لعيوب الناس متصنتة 
واللى على قوت الخلق سطا 
وناس واخدينها ....مقيطة 
وناس ضلامية ..موطوطة 
وناس ع الناس متسلطة 
وناس ف بلاوى متورطة 
وناس للناس ..متوسطة 
وعشان ما نقعش ف الخطا 
كفاية بقى شكوى وسلبطة 
يا زعبوط ماتبطل زعبطة 
ويا عطعوط بطل عطعطة 
دى دنيا ودايرة مخرطة 
وكام من عالى ووطا 
عيشوها سهلة مبسطة 
----؛:
بقلم / عادل شعبان