وليه احلم ...

مدام الحلم م الأخر

هيبقى كابوس يكتفني
ويرسمني

خيال مربوط على الهامش
ولو شافني ف يوم عايش

هيرميني ف ميت توهه
ودنيا بجد معتوهه

بترفعني كما الريشه
وترميني ف سابع أرض

وليه اضحك ...
مدام الضحكه حزنانه

وغرقانه
ف بحر دموع مالوش مينا

وموجه تجر ف سفينه
تاخدها جزيره مسحوره

ف عصر الناس ما تعرفهوش
مافيش إلا وحوش ف وحوش

مخالب تنهش الابدان
وترميهم ف عز البرد

وليه اصرخ ...
وانا صوتي الضعيف عاجز

يفوت خارج حدود حلقي
وحبل الصوت بقى لشنقي

وأهه تصارع التانيه
عشان تخرج

لكن أبدا ما تخرجشي
ف ترجع ف الوريد تمشي

تزلزلني بصوت الرعد
وليه أبكي ...

وانا الدمع اللي جوّايا
مالوش آخر

لو اسمحله ف يوم ينزل
هيبقى محيط

ولو حتى ما كانش محيط
هيبقى زي نهر النيل

ف يوم ما يفيض
ما يقدر يحجزه ميت سد

مانيش هحلم ولا هضحك
ولا أصرخ ولا أبكي

ولا هشكي ف يوم البُعد
أنا عن كل ده مرتد

م انا يا حبيبتي م الأخر
بنيتك فيّا صرح كبير

وفجأه ..
كل شئ اتهد

بقلم /سيد منيرعطيه