لمّا تسافري ..
مش رح أبكي
همنع دمع عيوني يطرطش
على تفاصيل الصوره ف قلبي
علشان قلبي الشايل صورتك
هيخاف جداً
إن الصورة تبوش من دمعي
أو تداريها غيامة عيني
مش هسمح للدمع يجيني
يحجب عنّي ملامح عايشه
جوّه القلب بقالها زمان
لما تسافري ...
مش هستفسر ع العنوان
ولا رح اتوه ف دروب العالم
ولا رح اسلّم للهذيان

مش رح ادوّر عنك برّه
لكن هدخل بين شراييني
ومؤكد .. جوايا هشوفك
قاعده ف نفس الركن الأبيض
جوّه القلب
واسمع نغمة صوتك حُب
وأحس بأنفاسك دافيه
بتطبطب على كل ما فيّا
وإيديكي بتحضن ف إيديّا
وتعدّيني الزمن الصعب
ياللي غرامك ف الروح شب
مهما البرد يزورني رح أفضل
بغرامك دايما دفيان
لمّا تسافري ...
إمشي ف كل طريق قُدّامك
بس حذاري

قلبك ياخدك للنسيان
مش رح اسامحك لو نسيتيني
ولا هقبل ف الشوق كتمان
دايما خلّي ف بالك إنّي
وسط البني أدمين .. إنسان
ممكن اغفر لحظة بُعدك
لحظة هجرك
لحظة صدك
إنما نسيانك يا حبيبتي
ذنب مالوش أبدا غفران
دايما خلّي ف بالك إنّي
قلب حقيقي
قلب يساعي العالم كُلّه
لكن يرفض
لحظة حُب تكون .. إحسان
بقلم /سيد منيرعطيه