احترت و احتار دليلى
بقلم..مرقص إقلاديوس
.....
سؤال محتار فى إجابته
صحيح
الطبع فى الدم....
يعنى ليه ناس
بتحب النكد
و تسعى بالمشوار للغم.
و ليه فيه واحد
اول ما يدخل مكان.
تحس ان الناس
بينها البهجة تعم.
تكون الأيام..و خبرة الأيام
و لعبة الأيام.
تقول ،فلان
ليه دايما كدة زعلان.
يقولك
الأيام تعباه
ابنه سابه و سافر يا ولداه .
و بنته
مش طايقاه.
و واحد تانى تسأل عليه ..
يقولولك
اصلك ما تعرفش،،
ده اللى إنت شايفه
كان اد ايه معاه.
و كانت كلمته
سيف على الرقاب.
شفت الأيام بهدلته ازاى.
و عملت ايه وياه.
و لا يكون الطبع تعودات
بتتكون كدة.
و يوم عن يوم
تلاقيك بقيت كدة.
مش عارف
بيقولوا فى حكاية
عقرب اتفق مع ضفدعة
تشيله على ضهرها
و تعديه قناية.
و فى نص المسافة
لدغها.
قالتله ليه كدة.
مش كان بينا اتفاق
لا خيانة و لا عذاب.
قاللها العقرب
اصل الطبع غلاب.
حكاية تستدعى البكا و النوح.
إنما بالحق
صحيح الطبع بيطلع بعد الروح.
و لو انى لا اظن
اصل مش معقول
اللى عاش شرير و مات شرير
للنار هيروح.
هناك هيفكر فى مصلحة الخلق.
اظن ان الطبع مش بيروح.
لو تعبان من طبع
عندك او عند غيرك.
و بسببه زاد بكاك و نوحك.
ارفع عينيك لرب الخلق.
و اطلب التغيير
صدقنى
ما يقدرش يغير الخلق.
إلا .....من خلق الخلق.
ملاح بحور الحكنمة
مرقص إقلاديوس
