الرضا صعب!!..و لا تعريفه..اللى صعب
بقلم ..مرقص إقلاديوس
....
يا ترى الرضا
له علاقة بالطموح.
معاه يعنى ..و لا ضده.
يا ترى
له علاقة بالتوكل
و لا التواكل
كلمة سره.
قاعدة (١) للرضا
تفلح( اللام تحتها كسرة)
يعنى
تعمل و تجتهد و تسعى.
و تصدق النية للخير.
و لا تجور و لا تقسى.
عشان
تفلح( اللام عليها فتحة)
يعنى ..تنجح.
....
قاعدة (٢) للرضا
تفرح الأول و بعدين تطمح.
تدى نفسك فرصة تفرح.
اوعى تأجل فرحك
مين عارف
يمكن لما تأجله
يسبقه أجلك.
و عارف
فرحك يعتبر لله شكرك.
اعتراف بجميله بما منحك.
و بعدين تطمح
يعنى بالترتيب
تفلح ..اللام بكسرة..
و لما تفلح ..اللام بفتحة..
تفرح
و بعدين تطمح
و ترجع من تانى تفلح ..
...
قاعدة (٣) للرضا
ربنا دايما
فى عقلك و قلبك.
ربنا نجح عملك.
ربنا سبب فرحك.
ربنا يحقق أملك.
إن شاء الله
و بإذن الله
لو بصحيح تتقال.
مش من اللسان.
تستقر
فى العقل و القلب.
و تثمر حب.
و يغمر الإنسان
حسن ظن بالله.
....
الكلام اخد و عطا يا صاحبى
و انا برضو صاحبك.
ربنا يراضيك و يراضينا
و نسمع كل خير عنك.
ملاح بحور الحكمة
مرقص إقلاديوس
