قصيدة زجلية : الزنقة ما تربي.

علاش تبكي بحرقة؟
الولد يتبع الّلي ربّاهْ
ماشي اللّي ولدو ونساهْ
فين كُنْتِ أيّام كان هْشيشْ
رْمِتيه منْ صُغرو للتهميشْ
تعاطى للسرقة و الحشيشْ
أيّام كان قلبو بيض صافي
كُلُّو خير ما يجافي ما يحافي
اليوم تْقَادُّو لَكتافْ
واشْ باقي منك يخاف؟
البنت تظل ف.الزنقة
لا قراية لا شقى1
ما طْيِّبْ طعام و لا مرقة
تظل تْدوَّحْ من مقشدة للبار2
الْبُو ما جَايْبْ خْبارْ
الأم خدّامَة ألنهارْ
حتى واحد ماعارف أشْ جَاري
الليل كُولْها يشد سداري
و الولد فاينو ؟
راهْ معَ الدّْراري
خْرجْ حاشية3
ما قاري ما بايع ما شاري
ولاش؟ مادام جيبو عامر
راه مرفوعْ، مْبَجْقَلَ4
الراس يطنطن ك.السطل.
مقرقبب و لاّ سكران5
البو ف.العشية يرجع عيان
بغا يرتاح بغا ينعس
الولد يخرج او يدخل بلاحس
مْنِّي البو ضرب لفكد6
ما لقى عندو ولد
هداك ولد الزنقة
تَمَّ كبر تَمَّ يبقى 
علاش تبكي بحرقة؟
هداك ولد الزنقة
الزنقة مدرسة
بلا أقلام و لا كراسة 
لا مدير لا حراسة
الوالدين يظلو خدامين
على الدراهم ملهوفين
لفلوس لاولادهم وَلّْفُو
شوية بشوية بداو يعرفو
الدراهم ف.الجيب 
و العقل الله يجيب
علاش تخبي
الزنقة ما تربي
الولد لوالديه ما مسوَّق7
ديما مرفوع ومبوَّق
ف. الانحراف صار متفوق
ياكل وحدوما يَدُوَّقْ
.ف.مرحلة الطفولة
حقوقو مكفولة
خاصُّو مع قرانو يلعب
و لاَّ يبدا يبكي ويجذب
من المدرسة يتغيِّبْ
البو تغلب و الأم تتعدب
ولد الفشوش
يكبر بعقل مغشوش
المعلم فيه ما ينهض8
وإلى ما نجح 
المعلم يَتْشْبَحْ
مني يكبر ويصير غول
شكون المسؤول؟
المدرسة اللي زولات العصا؟
و لاَّ العائلة بكثرة المعزَّة؟
و لا برامج الإذاعة و التلفزة؟
جاوبو،بلا نرقزة 9.
* *
شرح بعض المفردات المحلية:
1- تشقى: تقوم بأعمال البيت.
2-تْدُوَّحْ: تتسكع.البار: الحانة.
3- حاشية: لم يصب الهدف, يعني فاشل.
4-مبجقل: غير واع بتصرفاته
5-مقرقب: تناول حبوب الهلوسة.
6- لفكد: الكاف ب ثلاث نقط أي لما تفقَّد
7- ما مسوَّقْ: غير مبال 
8-ينهض:يوبخ
9-النرقزة: بتعصب (Nervosité
* *
عمر بنحيدي 5/7/2019