العقل عقلك ، و الرأى رأيك
بقلم..مرقص اقلاديوس
..........
اوعى تدى عقلك لحد ابدا....
لما تسمع حكاية
عدد أشخاصها أربعة
اوعى تصدق اللى يحكيلك
الا لما تسمع من الأربعة.
فى قطر من القطورات
كان قاعد فى واحد من الدواوين.
حارس و معاه متهم
رايح يوصله الزنازين.
و قدامهم قعدت
بنت جميلة و جدتها
ما تقدرش تحدد
قاعدين ساكتين
و لا قاعدين خايفين.
دخل القطر النفق
و النور منور ضهر.
و القطر بيجرى
النور قطع.
لدرجة انهم حسوا
ان القطر
هياخدهم لآخر العمر.
و فى لحظة
سمعوا صوت بوسة.
و رزعة صوتها شديد.
الجدة قالت لنفسها
لأ صحيح
حفيدتى قوية حرة.
م يتخافش عليها.
ما قبلتش البوسة،
و رزعت اللى باسها
على وشه
بعزم ما فيها.
و البنت قالت لنفسها
الشاب المجرم
انتهز الفرصة.
و بعتلى بوسة فى الهوا.
انما تيتا
زى عوايدها شديدة.
رزعته على وشه
عشان استغل الدرا.
الحارس قال لنفسه
الله يخرب بيته
معذبنى هنا و هناك.
يبوس هوا الجميلة
و اترزع انا على وشى.
طب بس اما نوصل
هاطلع
كل ده على عينيه.
بعد ما اسلمه
و بعدين امشى.
الشاب قال لنفسه
اخيرا ربنا ادانى فرصة
اخلص تارى.
بوست ايدى عشان تعمل صوت
و رزعته على وشه
اخلص شوية من ألم الليالى.
بعد كدة أما حد يحكيلك حكاية
ابقا احسب
كام واحد كان ليهم ادوار فيها.
عشان تروح
تستوضح من الباقيين الحكاية
و إن ما عرفتش تستوضح منهم
يا ريت لأجل الأمانة
تبطل تحكيها.
عشان ما تديش عقلك لحد ابدا.
ملاح بحور الحكمة
مرقص اقلاديوس
