اتكلمي ليه السكوت
ليه حابسانا ف تابوت
ليه عيشتنا حياتها موت
نفسي عليا تسلمي اتكلمي
واحشني ياغاليه سلامك
نفسي مره اسمع كلامك
انا ابنك الحر اللي صانك
يبقى ليه تتلجمي اتكلمي
أحكي على كل اللي خانك
اللي باع أرضك وهانك
اللي كسرلك عظامك
وانتي ليه تتبسمي اتكلمي
اتكلمي قول الحقيقه
نفسي يوم تبقي جريئه
ولادك عايشين ف ضيقه
وانتي ساكته بتبلمي اتكلمي
اتكلمي قولي الحكايه
ولا خلاص دي النهايه
والسكوت بقى ليكي غايه
مش عايزه ليه تتكلمي اتكلمي
أحمد سليم
