مين حس مرة
ان ابتسامتى من الوجع
أو شاف عنيا
وهما دايما حيرانين
مين مرة سافر
ويا حلمي اللي اتخدع
او حس زيي الغربة
علي طول السنين
ألبدر اشوفه في السما
حزن وجراح
والليل نجومه مضلمة
حتي الصباح
الشمس تفرد للحبايب ضلها
وانا شمسي تغرب
من بكايا علي اللي راح
مين حس ناري ووحدتي
والسهد طفي شمعتي
والعمر ماشي سريع سريع
بطيئة جدا خطوتي
في الدايرة وحدي
هناك بدور
وباعيش مع الذكري العدم
اكتب غناوي ع السطور
للفرح وانا كلي الم
ازرع محبة في القلوب
تطرح لي انا مر وندم
اتعب اوي. واضحك كتير
وعذابي بيزورني بضمير
قالوا ان عمر ما همني
وانا جرحي م الايام كبير
