( عوض الزمان )
°° أشعار °°
عمادالدين العيطة
بشتاق .. وهى جنبى
وكأن الزمان مخبى
ف عيونها كل فرحى
يازمان نسينى جرحى
وخلينى معاها
الإسم حنان ..
وهى الحنان
وف عنيها الأمان
ياعوض الزمان
دا كل الكون فداها
أبص ف عنيها ألاقى
الدنيا فرحة
وأتمنى وأقول ياريت ..
ألاقى الأمانى طرحة
وردة ف كل بيت
بحس وهى جنبى
إن الجنة جنبى ..
والدنيا ومافيها
فرحانة جوة قلبى
ولما أشوف عنيها
بألاقيها تغنى
ياأم رموش مليها
كحل وليل ساقيها
ولحبى تحنى
أنا ف قلبى مكانك
يامالية كيانك
وبقيتى حتة منى
روح يازمان بعيد
مش عايزين ساعات
إحساسنا بالوقت فات
وهنوصل ليلنا بنهارنا
وهنعيش كل اللى فات
هو العمر إيه ..
غير شوق وحكايات
وقصة حب حلوة
فى قلوبنا تبات
عطشان وإنتِ نيلى
سهران وعنيكى ليلى
أنادى وإنتِ تميلى
وتسقينى م الحنان
ياواحشنى وإنت جنبى
إذا كان الحب ذنبى
تعالى وتوبينى ..
بس تخليكى جنبى
عمادالدين العيطة
