أنا مصرى إبن مصرى و ليا الشرف
برغم المهانة ، برغم القرف
برغم الزباله اللى ماليه الشوارع
برغم الفساد اللى بيه اعترف
سمو معالى رئيس الوزارة
نتيجة موظف بسيط انحرف
برغم المجاعة اللى داخلين عليها
و فينا اللى عايش حياته فى ترف
برغم البطالة فى أوضه و صاله
برغم إن أخر جنيه اتصرف
برغم طابور الصباح السخيف
و كل منايا يادوب كام رغيف
برغم أسايا لمنظر عشايا
و أقول مش مهم يا واد نام خفيف
برغم إنى شايف بلاوى و ساكت
و عايش مطنش كأنى كفيف
برغم وزارة رئيسها حرامى
و شوفوا البجاحة يقولوا نظيف
برغم السلام اللى غرقت بناسها
برغم العيال اللى ساكنه الرصيف
برغم حكومة شعارها الكلام
و رغم رئيسنا عليه السلام
و رغم إن كله يا عالم بيغلا
إلا كرامتى بترخص قوام
برغم إنى عايش فى بلدى فريسة
و وجبة شهيه لبعض اللئام
برغم إن كل تاريخك يا بلدى
فى عهد جنابه كلام فوق رخام
برغم ده كله يا مصر باحبك
و طظ فيهم . ده أخر كلام
للشاعر : أحمد فؤاد نجم
ساحة النقاش