كل ماإجى أطلع عالطريق الدائرى أتوه مش عارف ليه؟ بالرغم إنى معايا ليسانس آداب قسم لغة عربية، و بعرف أقرأ عربى شويتن و مستوى ذكائى مش بطال، و حاصل على تلاته دكتوراه  ومشارك على تاكسى .....لكن الموضوع طلع أكبر منى.

يافطة تقابك و انت جاى من الغردقة على طريق القطامية الجديد تقولك إلى الأوتوستراد...ماشى ياعم فى انهى إتجاه؟ متعرفشى و يافطة تانيه تقولك مدينة نصر....فى أنهى حته ..فى أى شارع فى مدينه نصر...برضه متعرفش أما الطريق الدائرى ده حكايته حكاية  يقولك منزل 10 يودى على فين منزل 10 متعرفش لازم تفك الكود الأول كإنه منزل سرى بيودى على منطقة محظورة أو يمكن إللى كتب اليافطة ميعرفشى يودى على فين!!، يعنى يحصل إيه لو كان سايح لمؤاخذة سايق عربيته وراجع من النطقة السياحيه دى و عايز يدخل مصر هيفهم ايه من اليافطة اللى بتقول إلى الاوتوستراد؟!!! إمتى هنعمل زى الدول الوحشة المتقدمة...تبقى فى أى حتة و أى ميدان تلاقى يفط إرشادية توصلك للميادين الرئيسيه و كمان الطرق الرئيسية يعنى بالعربى لو انت داخل البلد تعرف تطلع منها  و العكس صحيح....سيبك مفيش أحلى من القعدة عالكنال و الشمس بتغرب ورياضة صيد الحيتان يالصنارة ولا ايه يالا يا إينووو ......