إنت.. والناس

العلاقات الإنسانية في الجامعة هي الرصيد الحقيقي اللي بيفضل لنا منها، واللي بيتشكل عن طريقه جزء كبير من أفكارنا وتجاربنا وشخصياتنا، وبيكون شيء مؤسف فعلاً رؤية العلاقات دي بتنهار أو بتسيب لنا ذكريات مش جميلة لأسباب ممكن تفاديها بسهولة.

أحياناً بنكون مش متعوّدين على عمل علاقات في مجتمعات مفتوحة زيّ الجامعة، وبعضنا بيكون جايّ من مساحات اجتماعية أضيق بكتير، عشان كده التواصل مع الناس بنجاح داخل الجامعة بيكون صعب أحياناً، لكن ما تقلقش.. مع وجود كل العدد ده من الناس جوّة الجامعة، عندك فرص كافية للتدريب..

شوية تكتيك:

- الإيجابية في العلاقة شيء ضروري، متسمحش للحاجات الصغيرة اللي بتضايقك من الناس تتراكم، ومتقنعش نفسك بإن المشكلة عارضة وإنها مش هتتكرر تاني، الحقيقة إنها هتتكرر لو متكلمتش، الثورة والعصبية مرفوضين، عرَّف الآخرين أسباب ضيقك بلطف، خليك واضح ومباشر؛ حتى لا يبدو الأمر وكأنه موقف شخصي.

- هاجم المشكلات وأسبابها، مش الأشخاص نفسهم، وراعي دايماً الفوارق في الأفكار والطباع والآراء، مش كل الناس شبهك.

- ناس قليلة بس جديرة بمعرفة أسرارك وتفاصيل حياتك الشخصية، اختيار الناس دي مسؤوليتك انت، لا تتحمس للآخرين بسهولة قبل أن تعرفهم جيداً.