هنتكلم عن فن الاتيكيت فى المقابلات الشخصيه ,,اللى هى الانترفيو ,, هنتكلم عن الحاجات اللى المفروض انك تعملها لما يكون عندك مقابله شخصيه فى شركه ما وفى وظيفه ما ,, بس اكيد هيكون كلامنا على القطاع الخاص وليس العام ,,لان زى ما انتوا عارفين فى القطاع العام شغالين بنظام الكوسه لو حضراتكم تعرفوه ! يعنى مش فارقه انترفيو او غيره ,,,يعنى لما يكون فى وظيفه جديده من قبل ما تنزل الوظيفه دى بيكون متحدد مين اللى واخدها ....... المهم

اخترت الموضوع دا نظرا لاهميته الكبيره جدا لكل الشباب وخصوصا اللى على وشك التخرج او اللى رايح يتقدم لوظيفه جديده ,,,, واتمنى الاستفاده للجميع ان شاء الله

### فى البدايه اكيد هيكون فى اعلان عن الوظيفه فى اى وسيله من الوسائل او بغض النظر عن انك عرفت الوظيفه دى ازاى ,,, اكيد لازم تتصل وتقدم بياناتك عشان تحدد موعد للمقابله الشخصيه او الانترفيو

@@ حددت الميعاد يبقا لازم وانت رايح للمقابله يكون معاك كل الاوراق اللى ممكن تحتاجها عشان دا هيوفر عليك وقت كبير ومجهود اكبر وكمان هيدى انطباع جيد للمتحن ,,, هيتكون عنده شعور بجديتك واستعدادك للوظيفه

###فى مقابله التوظيف لازم يكون فى احترام متبادل من الطرفين سواء من الممتحن او من المتقدم للوظيفه بس فى بعض الاحيان ممكن تلاقى تصرف ميعجبكش من الممتحن ودا بيكون عن قصد ,, وبيكون عايز يشوف ايه رد فعلك فحاول على قد ما تقدر تتصرف من غير عصبيه

### هتعتبر مجامله منك لو صرحت انك دائما ماتتمنى هذه الوظيفه ,,, والمجامله مبتتنسيش وهتكون فى صالحك ......بس فى الحاله دى لازم يكون عندك معلومات كافيه عن الشركه ,,, والمعلومات دى ممكن تتطلب من الشركه انها تبعتهالك ,,, ولو تعذر ارسالها ممكن تروح انت بنفسك لاداره العلاقات العامه وتطلب المعلومات اللى انت عايزها وغالبا بيكون للشركه مجله شهريه وهتلاقى تقارير سنويه عن الشركه

#### موعد المقابله والنقطه دى هامه جدا ,,, عشان دايما بنلاقى الحجج والاعذار للتاخير عن الميعاد ودا بنلاقيه فى الحياه كلها يعنى مش هنا بس ,,,ممكن يقلك كان فى حادثه فى الطريق ,,, المواصلات صعبه ....الخ
تقديم هذه الاعذار لايعطى الا انطباع سئ عنك وانت فى غنى عن هذا الانطباع

فى حاله ان استمر التاخير لازم فى هذه الحاله تجرى اتصال بالشركه او بالممتحن مباشره وتديلو تقدير بموعد وصلك ,,, دا ممكن يلطف العمليه شويه

@@ الطريقه المثاليه فى الموضوع دا انك تروح قبل الميعاد بحوالى 20 دقيقه ودا هيخليك مسترخى بالشكل الكافى وهيبعد عنك التوتر

#### بالنسبه للمظهر بقا
النساء يجب ان يرتدوا ثوبا محتشما وليس فيه مايلفت النظر يعنى ممكن تستغنى عن البدى شويه ,,, معلشى هنتعبك بس لازم ,, اصل انا عارف ان البدى دلوقتى بقا شئ اشبه بالمقدس سورى يعنى ,,, نكمل الموضوع

الرجال يجب ان عليهم ارتداء البذله كامله برباط العنق يعنى نبعد عن الكجوله والروشنه شويه ,,, ولازم قبل المقابله تحدد وقت بسيط كدا تروح فيه الحمام تتاكد من مظهرك وتسريحه شعرك ,,,والحذاء يكون لامع ,,, ولازم الجوارب تكون طويله بحيث ان ساقك لا تظهر عند الجلوس ,,, واحرص على ان تبدوا اسنانك ناصعه البياض ,,, ورائحه فمك طيبه

### الدخول

تستطيع بخلقك الحسن واللطف ان تحيط نفسك بالنوايا الطيبه حتى قبل ان تدخل الى غرفه المقابله .. من خلال مرورك بالموظفين بالشركه وتحيتهم ... الرؤساء احيانا يسالون السكرتاريه عن انطباعاتهم عنك


### المواجهه
تشير الحقائق الاحصائيه الى ان نتيجه مقابلات توظيف كثيره تتحدد خلال الثوانى الثلاثين الاولى ... وبكدا انت فى ايدك انك تاخد درجات كتير فى البدايه ,,,, تذكر اسماء الذين يجرون المقابله واستعرض قوه ذاكرتك بتكرار اسمائهم اثناء التعارف ,,, اذا كان الممتحن غريبا او اجنبيا لاتخاطبه باسمه الاول الا اذا طلب منك ذلك
ممكن تقول " صباح الخير يا استاذ مصطفى مثلا "" بس مع الغريب او الاجنبى لاء

الرجل عند التعارف يذكر اسمه الاول والاخير بدون كلمه سيد

المرأه كذلك

خاطب الممتحن ياسلوب ودود محترم واعتبره فردا عاديا جديرا بالمحبه والصداقه الدائمه , لامجرد عصا تتوكا عليها للوصول الى الوظيفه ,,, لان الممتحنين بيكونوا اصحاب مناصب كبيره فى الشركه ,, وعمل صداقات معهم هيفيدك كتير

@ تبدا المقابله عاده بالتحيه ثم المصافحه . ما لم يبادر الممتحن بمد كفه . قدم يدك اليه اولا ,,, ولكن قد يكون الممتحن سيده فيجب فى هذه الحاله ان تبدا هى بمد اليد ,, واذا لم تفعل ,, فلا تمد يدك

خلى بالك من المصافحه دى مهمه جدا وليها استدلالات كتير ,,, يعنى بلاش تصافح بقوة ولا تصافح بارتخاء وعدم اهتمام فلكل منهما معنى سلبى ... ولكن يجب ان تكون فى المتوسط مع انحناءه بسيطه ولا تزيد عن ثانيتين او ثلاثه .... ودائما احرص على الابتسامه

### حديث الجسم

كل حركه فى جسمك ليها معنى ....ويبدا اشتشفاف التمدن والانفتاح من لحظه جلوسك .... يجب ان تتحاشى عقد ذراعيك ,,, ولا تجلس متصلبا ,,, ولكن اجعل ظهرك مستقيما ملتصقا بظهر المقعد وكن شديد اليقظه ... ولازم دايما يكون فى اتصال بالعين مع اللى بيكلمك ... احذر هز الساقين او حك الوجه .... انت ممكن تقابل ممتنيح يوتروك ودا ممكن يكون مقصود فلازم دايما تحافظ على هدوك وتحافظ على تصرفاتك

#### ممنوع التدخين اطلاقا حتى لو كان الممتحن يدخن

### لو سئلت عن عملك السابق وكنت بتشتغل فى شركه قبل كدا دايما خلى كلامك عن الشركه دى كويس

### اذا قيل شئ ما لايتفق مع رايك اذكر ذلك باحترام ولا تنساق لكل الاراء ولابد من اظهار وجهه نظرك

### مهما يكن احتياجك للوظيفه تمسك باحترامك لذاتك ولا تسمح لاحد ان يعاملك بخشونه وبدون مبرر

### بلاش تتكلم فى المرتب او الاجر الا بعد تغطيه جميع اوجه الوظيفه ,... ولا تتهاون فى نفسك وفى قدراتك

### بعد انتهاء المقابله اخرج من نفس الطريق الذى دخلت منه ... ابتسم واشكر الممتحنين على اعطائك فرصه اللقاء بهم ..... لاتنسى تحيه موظفى الاستقبال اثناء الانصراف

### اكتب رساله شكر قصيره لرئيس الممتحنين