رباعيات غريب فى دبى

بنخط فوق سطر الكتابة دمنا
وبنكتب الأيام بلون أحمر
مش أحمر الورد اللى فخدود حلمنا
ده أحمر العمر اللى صار يتكسر
عمرى

وركبت طيارة الهموم ولفوق
طارت بجسمى بس روحى هناك
أنا كنت فاكر طيارتنا الطوق
أتريها طعم الموت بنكهة هلاك
سفرى

مشوار رحيل متلعبكين جواه
بدايته ونهايته سيان مهو ألعبان
تدخل هنا ...تخرج هنا أواه
متلخبطه وتوحده كل الببان
رحيل

قدامى مية صوره ولا شايف
متلخبطه الالوان وكأنها زفه
بتزفو مين يا اهل الزفاف خايف
ليكون حزين وعيونكو مش شايفه
صورتى

سرىلانكى فى هندى مليزى بنجلاديش
اسمع وميز ....كيف ؟! ده يجى مليون وش
مرعوب وخايف جوه أرض اللغه
ليجيها يوم وسط اللغات وتكش
دبى

وبقيت نطور واقف على البيبان
بعد اما كان الكون ما يساعك
تفتح وتقفل كل بابٍ كان
خايف لتقفل يوم على اصباعك
عجبى

صرصار وحط راسه قصاد راسى
ميخفش من هزى ولا انفاسى
شخطت فيه قال لى متشخطش
وعشان غريب حقك على راسى
نومى

عفريت روسيه جانى ف الأحلام
يرطن بلهجة عشق روسيه
فتحت عينى وقلت والله ما نام
دنا جوه قلبى بنت مصريه
حبى

ضحكت بصوتها العالى دهشتنى
من جوه أحزانى وشالتنى
نطقت ....يا قلبى إفتح البيبان
قالت بكام والكلمه دهستنى
ادفع

شيطان ف ودن العبد وسوسله
ما اجمل عيونها ويا كاس بيره
اشرب وخلى الحزن ليه أهله
أنا قلت شارب بس من الحيره
عجبى

شيطان كبير راكب على ضهرى
أسجد وأركع برضو ويايا
يا رب قوينى على أمرى
عبدك ضعيف والذنب جوايا
ربى

ملعون أبوك يا قرش برانى
ندفع عشانه دم أيامنا
ما انا كنت باخد قرش جوانى
صحيح قليل بس من دمنا
بلدى

قالو بلدنا قلت هيه الروح
مطرح مروح بدب جوايا
قاسيه وناسيه بس فيها الروح
أهلى وناسى وفرحى وأسايا
بلدى