( 1) انك تنده ... معقول
انك تزعق... معقول
انك تعوي... معقول
ان محدش يسمع !
هوا ده اللي مش معقول
هل م الزحمه ؟
او قلة رحمه ..... محدش عارف
ساحبه الدنيا الخلق
والروح وصلت للحلق
تايهه الخطوه وخايفه
وعيون شايفه وماهش شايفه
واخدني العمر وماشي
على فين انا مادرا شي
ندخل يوم
ووراه يوم
نعدي سنين
ولفين رايحين؟........ محدش عارف
(2)
وأ سأل عمري ياعمر
فاض بيّا الصبر
اخرة كل ده ايه؟
واللي احنا فيه ده ليه؟
نازلين
نحب و نعشق
نشقى و نعرق
نضحك..نشرق
نبني و نمضي
ده مولود
ده مفقود
ياعمر خليك عاقل
نفسي مش قادره تواصل
بتترنح م الضيقه
فين هيّا الحقيقه؟!
ما تيجي نسأل
ولا الكل بيجهل
ويطلع بعد مانسأل........ محدش عارف
( 3 )
يرد عليّا و يقول
لابد من قدرك تنول
ومهما تطول المعاناه
ف الاخرقصيره الحياه
ليك في الدنيا دي رمحه
ح تعدي زي اللمحه
لحد مانوصل بوابه
تدب في القلب مهابه
ساعتها ح نفترق
ويا تحيا..يا تتحرق
هناك ح تعرف الحقيقه
من غير ذواق ولا تلفيقه
وياريت
الصراخ كان ينفع
ماكانتش
عين الزمان تدمع
يبقى امشي ولا تسألشي
وكفايه مناهده وماتصرخشي
عشان الرد
فيه ايه الغد....؟ محدش عارف
( تمت ) انسي المصري
ساحة النقاش