لسه جوه الضلمه نور ..

لسه جوه الحلم عمر ..
لسه صوتك لو يثور ..
قادر إنه يدى أمر ..
لسه جوه الحزن دمعه ..
لو تشوفها و هى لامعه ..
كنت تعرف إن هى ..
لسه مستنيه فرحه ..
لسه روحك شابكه ضى ..
لسه جواك نبض حى ..
لو تركز كنت تعرف ..
إن حلمك جى جى ..
جاى و مستعجل عشانك ..
جاى و بـ يشاور عليك ..
و إنت لو واقف مكانك ..
راح يشدّك من إيديك ..
بس نِفسه تكون مصدّق ..
كل حلم و ليه حقيقة ..
فـ إوعى تيأس أو تقول له ..
أصلى مش لاقى الطريقة ..
سيبها لله و هى تمشى ..
و إعمل اللى ما يتعمل ..
مهما فات الوقت إعرف ..

إنـه لـسه فيه أمـل ..