انا يعنى كنت هاعمل أيه !
- كل حاجة كانت ضدي
- كنت بحبك .. بس فى نفس الوقت ما كنتش قادر اقدم خطوة
كانو هايسألونى
* معاك شقة ؟
- لأ
* معاك وظيفة ؟
- لأ
كان شكلك انتى هايبقى وحش قبل مني
ايوة انا وعدتك وأيوة اللى بينا كان كبير وعدى حواجز وكنت عارف ومقدر ده
وعارف ان أى حاجة عملتيها او رضيتى بيها كان علشان بتحبينى ..
وعلشان عايزانى وواثقة فيا ومصدقانى
انا قبل ما اوصلك كنتى حلم بالنسبة ليا ومش معقولة لما طولتلك اضيعك منى بسهولة وابقى قاصد ده ... مستحيل
- لكن انا كنت فاكر إنى لما هاخلص جامعة وجيش الدنيا هاتضحكلى
وتاخدنى بالحضن والاقى الشركات مستنيانى وبأحسن مرتبات
لكن انا اتصدمت بالواقع و لقيت عكس ده
حتى لما قولت اسافر اكون نفسى الغربة نفسها رفضتنى !!
كان لازم ااخد قرار اننا نبعد وما نكملش ما كنتش هاقدر ابان ضعيف اكتر من كده قصادك وابان عاجز وقليل الحيلة .....
انا لسة فاكرك - تفاصيل هزارنا وضحكنا .. وحلمنا
وحاجات كتييير ماحدش هايفهمها غيرنا ..
بعد السنين اللى بعدناها دى ورغم انى ما عرفش عنك حاجة انا ما بتمناش ليكى غير كل سعادة وفرح انتى ما تستاهليش غير الفرحة لأنك طيبة ..
