ناقص علامك يامة
وسط الصحاب ال اعرفها ووسط العامة
معلمتنيش احب البحر
امشي لوحدي الليل
اعالج بأيدي الجرح بحبة مررما
معلمتنيش ليه
لمين احط الفصلة ولمين احط الضمة
ايام كان
زمن جميل الخال والام زي العمة
لية معلمتنيش
ممكن يموت شجر الليمون
جوا العيون
وان زي ما فيه الناس الخير
فيه برده الناس الدون
ومهما يكون
انتي علمتيني ارفع
غصن الزيتون
لما ف وسط الضلمة اعافر
وعايز اكون
ع العموم يامة
نفس الجهه ونفس اليامة
لسة واقف انا منتظر
اتعذر واعتذر
وبشد الشوال والهمة
والمهمة
وعارف لسة منين اعوم
نواحي الشمس ونواحي النجوم
وعارف
كل ال كنت افهمه زمان
وكل ال مش مفهوم
وللمعلوم
ع الارض لا شئ فيها بيدوم
الاباء والعموم
بشر حجر طاووس بوم
وكتير مما
علمتهوني يامة
وكان ياما كان
واحد وعاش غريب
عازف كمان
يغني للشجر
والشجر واقف دبلان
يا هلتري آن
ولا لسة ما آنشي الأوان
علي صوت الادان
اديني واقف مستني
ومتني
اضحك للبحر مرة
ومرة للاحزان
اعيش حياتي ال محبيتهاش
بلا انسان
انفرج علي وشوش الناس
وقت بيع الذمة
اقارن بين القلوب البيضا
وقلوب الناس الرمة
اتعجب طباع الخلايق
وبعض الناس الأئمة
الله يسامحك ياللي
لبستني العمة
