ليه بس يازمانى مليان عجايب وغرايب

ابن حلال فيك بيعانى والندل هايص والخايب
ليه العجوزه المحنيه بتحط لاحمر فى خدودها
دي عامله زي الجنية يا رب توب علينا
وليه بقى الشيخ الفاني بيصبغ الشعر الشايب
ليه بس تصبح يازماني مليان عجايب وغرايب
ليه المشايخ تقعد ليه يا ناس تحرض للأرهاب
والأعمى والعاجز بعينه عاوز يسوق السيارة
الأخرس بيرطن ألمانى أما الفصيح دايما هايب
ليه بس تصبح يا زماني مليان عجايب وغرايب
ليه اللي كاوياه الأزمة والأمر ظاهر مش خافي
بيقول لك المال ع الجزمة وتلتقيه بيدوس حافى 
عامل عظيم أه يانى والتوب عليه مهري ودايب
وليه بس تصبح يا زماني مليان عجايب وغرايب
وليه بقى تخلى الدجال يوصف لأمرضنا بلاوي
عجيبة لما يدور على القنوات الفضائيه ويقول نطيب ونداوي
دواه مرضني وعييانى وخلى في الجسم معايب
ليه بس تصبح يا زمانى مليان عجايب وغرايب
ليه اللى بيقول صلي وصوم ويوعظ الناس ع الماشي
تلقاه ضلالي يا عيب الشوم طول عمره عيزها بحور دم
إخلاصه طبعا براني وهو عاصى مش تايب
ليه بس تصبح يازماني مليان عجايب وغرايب
ليه اللى بيخلف بنتين يفضل يعزب في مراته
علشان ولد ياخي دا البنين مش راح يشوفهم في حياته
ليه يخطب من تانى دي مراته ست ما تتعايب
ليه بس تصبح يا زماني مليان عجايب وغرايب
ليه الصنايعي إبن الكار بيخاف ليقطع أرزاقه
إن شاف يوم رح يصبح جار يزعل ويمسك في خناقه
دا الرزق بالله لازم بقى تكونوا حبايب
ليه بس تصبح يا زماني مليان عجايب وغرايب
ليه المحاسب والكوسه يا بو خليل لهم مراكز في بلادنا
بيمرحوا فى خيرات الحكومه والجوع ح يقتل أولادنا
ليه بس تصبح يازماني مليان عجايب وغرايب
وليه بقى الفقها الحافظين بيرغوا والقرآن داير
واحد بيقرا والتانيين في شرب دخان وسجاير
أحلف بدينى وأيمانى إن الزمان كله عجايب
ليه بس تصبح يا زماني مليان عجايب وغرايب