أذا مليت حبي براحتك معذور)
اهجرتني بلا سبب ومشيت...
شنهو اسباب هجرانك !؟
اذا سامع خابر لوشفت شي هم كول
أريد اسمع كلام بعظمة اللسانك
وأذا تعتب عليا منك ارضى اعتاب
بس كون العتب من طيبة احسانك
ماريدك تجيني بلا عذر مقبـــول
ولا رايد تُهم من نسج بطلانـــك
ماعندي ذنب كل ذنب ماسويـت
ولا ناوي اصير اسباب خذلانك
احبك والله يشهد ابد ما زليت
وحفضتك بالكلب موسهل نسيانك
عنواني صرت من الالف للياء
ودفتر ذكرياتي انطبع باالوانك
تتركني تريد اتروح الله اوياك
ماارضى اصير ادموع بحزانك
ولارايد محبه يشوبها الخذلان
المحبه بلا وفا معناها خسرانك
مثل قطعة حديد وصرت وسط النار
بين المطرقه ومابين سندانك
ورغم نارك لهبهه امسابك ويه الريح
استانس كنت لو شفت دخانك
اذا مليت مني براحتك معذور
مااوصل بعد وتعنه ديرانك
صح انت عزيز وصورتك بالعين
وثابت بالدليل وهذا نيشانك
ماردلك طلب تعرفني كولش زين
وجاي اتريد تطلب مني سلوانك
اذا سهله عليك تعوف حب اسنين
صدك بالمنام اتخيل احضانك
راح اصبر وحاول يمكن اني انساك
نزولا للطلب والخاطر ايمانك
قافل عالبعد اعرف لكيت اصحاب
من عندي خذوك ونقص ميزانك
بس ترجع الي وصدكني مو تهديد
ولا تفكر غرور ايصير باذهانك
تدريني بسيط وأبد مامغرور
بس ياللاسف انغريت بنسانك
روح بلا وداع بلا خجل معذور
وابد لاتعتذر مطلقلك اعنانك
راح اترك اجروحي تنادي بسمك دوم
وامسح من دليلي حروف عنوانــك
,,,أذا مليت حبي براحتك معذور,,,
