منستشى أرضى ولا فاسى
ولا حتى ريحة الطين
بس الأوامر فى الدواير
خلت عشتنا طين
مختارشى ليه زرعتى
حر ولا سجين
والمية غابت فى القنا
لحد ما جف الطين
وقلبى فى صدرى إنكوى
لموت حقى فى القوانين
الزرع فن وغنا
موال بقالو سنين
والكل عيشته نغنغة
وأنا اللى عشتى طين
كعوبى اللى فلقت
وإيديا خشنها لمين
كانت حياتى مزهزهة
زمن طويل التيل
معرفش إيه اللى جرى
و الرز كان له بديل
وقشه هجره الورق
واتعمل عليه مواويل
سحابة سودا واتخنق
من دخن حرقه عليل
والسد سد وفرق
بين موارد النيل
والخوف لبكرة حرق
أمل كل المزارعين
أخرتها إيه يا جدع
قاعدة ومد الإيد
اللى تجيبو الأرض
مايكفى دروس تعليم
ونجيبها طول أو عرض
منلاقى سلف مليم
غير اللى عينه ع الأرض
يلم م الغلابة فدادين
والتهمة أرضك عرض
وليه هملت الطين
دا العيشة زى النرد
هتزهزه بجد لمين
..........وائل سعيد ..........
