همزة فوق ألف الأم
شعر الشاعر / محمد عابدين زايد البلصفوري
أحن الي خبزأمي
وجلسةأمي
وضحكة أمي
والفطير اللي اتفرد من تحت إيدها
ونشابتها
والولاد اللي جابتهم
دولا هما رجالتها
والبنات اللي تربوا في كنفها
وتربيتها
الفرن ديه ياجماعة
من ريحتها
واللي ماسكينها هناك
دي بلاصتها
كلنا منها الجبنة محلاها
بصحيح
واللي يدوقها مرة واحدة
يبقى طول عمره فصيح
وكل ما سيرته تهفهف في المجالس
كلهم بيقولوا عنو قول مليح
نفسنا في لقمة ياما من ايديكي
نفسنا نعمل حوايج العيد
ونسهر حواليكي
نفسنا في شوية البامية الجمال
والملوخية أم طشة
اللي عطسوا من ريحتها في الكنال
وطعمها الله عليه
وهيا دي عاوزه سؤال
نفسنا في لحمة( القسامي )
في يوم الخميس
اللي ابونا عليه
كان دايما حريص
نفسنا في اللمة ديه
بامية ويكا وملوخية
وأمي (الف رحمة ونور عليها )
راصة رغفانها الطرية
مش راصة عيش م الطابونة
بدون هوية
ولا سمنة مقدوحة ريحتها
مية مية
ولا بطة محشية فريك
لحمها يملا صينية
غرقتهاأمي ف السمنة الصعيدي
واتحمرت في الفرن ديه
ولا ف ايام الشتا
كنا ندفي بانفاسها الزكية
الف رحمة ونور عليكي
ياللي من ربي هدية
الف رحمة ونور على والدي كمان
اللي سار بالمركبة لبر الأمان
واللي تعب لاجل مايريحنا
في تالي الزمان
يعلم الله بندعي ليكم
تسعدوا ف اعلي الجنان
ربنا يجعل رضاهم من نصيبنا
دا رضاهم من رضا الرحمن
صلوا على الهادي نبينا المصطفى
رمز الوفا
وكتابه القرآن
