لو ليك عندي لسه حرف

للاسف بقي حرف بايخ

ولو بين مرار ريقي ليك طعم

والله طعم ماسخ

كنت حرف

وكنت طعم

بقيت هم

بس ياخساره هم كاتم

هم طافح

غم طافح

وعلي راي المثل

موت مظلوم 

ولا تعيش في يوم ظالم

لوكان علي قلبي

هدوسه لوحن ليك

وان كان علي الحرف

همسحه لو اتكتب ليك

ولوكانت علي المشاعر

هنسي اني شاعر

وانسي يوم ماكان فيا ليك

حبه مشاعر

وابقي فاجر

وابقي قادر

وابقي بركان يحرقك

وابقي الضمير اللي

كل يوم هيفكرك

وابقي الندم اللي ماليك

وابقي القشه اللي هتكسرك

وابقي الحلال اللي في حرامك

وابقي الكلام اللي يوجعك

ولما تبقي اشلاء انثي

ابقي الوحيد اللي يقدريجمعك

انا زي مادخلتك جنتي

قادر في لحظه 

من غير مؤاخذه اطلعك

حتي دموعك

والله طفيت شموعك

وزي ماعليت مقامك بين البشر

بيدي برضو هوقعك

وزي ماكتبتك قصيده

بنفسي حروفي همسحك

احمد عبدالحق