()//() يا وابور. ()//()
يا وابور رايح علي فين
روح لحبيب العين
و امانه تسلم بحراره
حلفتك ب جد الحسين
ياما وصَلت حبايب
وبهدايا حملت وجايب
وجبت مشتاق و غايب
قلي يا وابور علي فين
مالك عجزت و شيبت
بقيت ترسوا وتعبت
وقتلتلك كام واد وبت
وبتجرح قلب وعين
حتي فراملك هربانه
وبتآذي ف ناس شقيانه
عوضين وحسين و بَهانه
خف حوادثك حبتين
يوماتي بنقرا ونسمع
بنحزن وعنينا تدمع
ياللي كنت تقرب وتجمع
دلوقتي تسفرنا ماشيين
ارجع للايام الحلوه
جامد وسريع وفتوه
وافتح صدرك بالقوه
و اجريلك ف دقيقه مِيلين
بيقولوا راسك عفريته
حافظة سكه و خريطه
بتزغرد وتدق طرمبيطه
هيبه تخوف بني ادمين
ع السكه تزلزل اراضينا
بتجري شايفين م التراسينا
تظبط ساعة ادينا
تفكر ب الوقت الناسيين
امانة عليك تفرحني
تسفرني بلاد وتفسحني
متباقش عجوز ومحني
وتشمت فيك عَدوين
الشاشه عملتلك قيمه
وباب الحديد ف السيمأ
افلام كتير قديمه
شوقي وهند وشاهين
اغاني عنك كتبوها
رايح علي فين وقالوها
مين ف الولاد ينسوها
سميعه والاتيه ومطربين
الشاعر ..عادل عباس علي
