زمن النت.. شعر (علي محمد شحاته)
كنا صغار وعرفنا الحب..أول حاجه كتبنا جواب
كلمه وشعر يزيد القرب.. ييجى الرد نكون أحباب
نبعت ورد وعقد الفل..أو جمله علي ضهر كتاب
كل منايا قمرنا يطل ..وترحل أى دموع وعتاب
أيام ولت ويا سنين..عمر ما ننسى أعز أصحاب
عدت لكن قلبى حزين..يحلم ترجع بعد غياب
بعد ما كاد العقل يشت..مش بإرادته له أسباب
لما بقينا فى زمن النت.. وإتفتحت كل الأبواب
لما حبيبك ع الفيسبوك.. يبقى أكيد حلو وكداب
حلك هوه عملت بلوك ..وبلاش منها البت رباب
كلم فديو وكلم فون..مع أحباب ويا الأغراب
نشن حلو هات الجون..روق كبر دا إحنا شباب
عايز إيمو عايز واتس.. واليوم كله منال ورحاب
أمال ترغى بس بهمس..أو مشغوله مع الألعاب
لما قعدنا نقضى ساعات..نمشى ولكن خلف سراب
وقتنا ضاع ونسينا حجات..قمنا قفلنا عليها الباب
مين دلوقتى لأهله يزور..أو للميت تحت تراب
عدى علينا شهور وشهور..صار النت ما بينا حجاب
حتى ف بيتك صرت غريب ..مع تليفونك أو ع اللاب
كله بناحيه بشكل عجيب..عينك صاحيه وعقلك غاب
فين إعجابك أعمل شير..فين منشورك ويا شهاب
مش هنبطل عمل الخير..خلى سلوكك كله صواب
إعلم إن المولى رقيب..وإن قريب وقت حساب
إدعى لربك هوه مجيب..يرفع عنك كل عذاب
بكره جوارحك همه شهود..كله مدون جوه كتاب
لما يا قلبى لربى تعود..يومها ترفرف أعلى سحاب
تعرف باقى بعمرك كام ..شوف بمرايتك شعرك شاب
أغلى منايا حسن ختام..من أسماء ربى التواب