<!--
يعنى إيه اكتئاب؟(1)
أنا مالى؟ إيه اللى جرى لى؟ حاسس الدنيا متغيرة أو يمكن أنا إحساسى بيها اللى اتغير...ايوة أنا إحساسى اتغير بكل حاجة حواليا...اللى كان بيبسطنى ويسعدنى بقى ثقيل قوى على أو مش حاسس بيه أو مش فارق معايا...الحاجات اللى كنت بأحب أعملها وبألاقى فيها نفسى مش فاكر إيه هى أو مش عايز أفتكرها أو مش فارقة أصلاُ معايا..وبعدين إيه ألاقى نفسى دى أصلاً أنا ماليش قيمة وكل اللى عملته فى حياتى كان غلط...ساعات بأكون واهم إنى ناجح فى حياتى بس فجاة أو من شوية اكتشفت إن أنا بأضحك على نفسى أنا مش متأكد إنى بأحب شغلى ولا عارف إذا كانت زوجتى بجد تستاهلنى أو أنا أستاهلها أو إحنا اخترنا بعض صح من الأصل؟ ولا متأكد إنى فعلاً بأحب أولادى وعايز أعمل لهم مستقبل كويس واللا لأ...أنا ما بقتش متأكد من أى حاجة ساعات بأحس بقلق شديد مالوش سبب واضح وساعات بأكون حزين وساعات بأكون ناقم على كل حاجة ونفسى الزمن يرجع وأعمل حاجات كثير ما عملتهاش وكمان ما أعملش حاجات تانية عملتها ويارتينى ما عملتها...وساعات بأحس إنى مش حاسس بحاجة خالص كأنى فضيت من كل المشاعر لو سألتنى ما أعرفش حاسس بإيه دلوقت ممكن قوى ما أعرفش أرد عليك ...بس ياترى الموضوع ده ممكن يطول معايا؟ طيب هو أنا ممكن أتجنن؟ أيوة أنا خايف إنى أتجنن بجد...![](http://media.kenanaonline.com/photos/1238292/1238292572/large_1238292572.jpg?1358538743)
الكارثة بقى إن الناس اللى حواليا مش فاهمين ولا حاسين باللى بيحصلى..اللى يقول لى غير جو واللى يقول لى خد أجازة وحاول ما تقعدش لوحدك كثير...أنا أصلاً عمرى ما كنت بأقعد لوحدى بس دلوقت أنا مش قادر أقعد مع حد...كثير قوى لو حسيت بقلق شديد مش بأحس بالأمان إلا لو قعدت لوحدى وطفيت نور الأوضة...لما بأقعد مع الناس قلقى بيزيد...وكثير مش بأكون معاهم ولا عارف هم بيقولوا إيه...إيه اللى أنا بقيت فيه ده وليه؟وممكن أرجع زى الأول واللا لأ؟ أنا فعلاً حزين![](http://media.kenanaonline.com/photos/1238292/1238292577/large_1238292577.jpg?1358538815)
علشان نجاوب على الأسئلة دى...حنقول ببساطة فى الأول كده...اللى أنت فيه ده اسمه اكتئاب....ليه ومن إيه؟ ده موضوع شرحه يطول بس حنقوله بإذن الله...ترجع زى الأول؟؟؟!!! هو مش المفروض ترجع زى الأول لأن الأول بتاعك كان مش حلو وإلا ما كنتش وصلت للحالة دى....لكن المفروض تتغير علشان تكون أحسن من الأول وعلشان تتغير يبقى لازم تفهم وعلشان نفهم يبقى لازم نبتدى الحكاية من الأول...ياللا نحكى...ناس كثير ممكن يصابوا ببعض أعراض الاكتئاب ويسألوا كل الأسئلة دى هو أنا ممكن أتجنن؟ هو أنا ليه حصل لى كده طيب ممكن أرجع زى الأول وفى الغالب إن الناس اللى حواليهم برضه بيكونوا مش فاهمين..يقولوا ضغوط شغل...مشاكل أسرية...أو يمكن تكون صابتك عين ردية ......
تعالوا نشوف نبتدى منين حكاية الاكتئاب.....بس لازم نعرف حاجة مهمة قبل ما نبدأ فى الكلام وهى إن كلمة اكتئاب هنا نقصد بيها نوبات الاكتئاب العظمى....يعنى الاكتئاب اللى بجد....اللى مش حيعرف فيه صاحب المشكلة إنه يساعد نفسه لكن محتاج فعلاً تدخل علاجى دوائى وعلاج معرفى سلوكى علشان يقدر يغير طريقة تفكيره وأسلوبه فى الحياة لأن ده بيساعد كثير فى تقليل حدة الاكتئاب وكمان بيقلل فرصة حدوث نوبات الاكتئاب بشكل متكرر ...يعنى تطوير طريقة التفكير تجعل نوبات الاكتئاب أقل كماً وكيفاً....لكن العلاج الدوائى ضرورى فى المراحل الأولى من العلاج وممكن كمان يستمر أثناء جلسات العلاج المعرفى السلوكى خاصة لو كنا بنعتمد أكثر على العلاج المعرفى التحليلى والذى يعنى يتغيير طريقة التفكير لكن يعنى أيضاً بتطوير قدرة الفرد على اكتشاف مشاعره ومعرفة من أين ومتى بدأت الخبرات الشعورية المؤلمة وده فى الواقع ممكن يجعل المعالج يلجأ للأدوية النفسية مع العلاج المعرفى لتخفيف وطأة الألم الناتج عن كشف المستور......(الخبرات الشعورية المؤلمة الكامنة فى العقل الباطن)....المهم بصراحة ناس كثير من اللى جربوا العلاج المعرفى وكملوا مع المعالج اقتنعوا إن هذا النوع من العلاج يغير طعم الحياة....طيب هو الاكتئاب ده بيحصل ازاى؟ نقدر نقول إن الاكتئاب نتيجة كوكتيل من أحداث وضغوط خارجية مع طريقة خاطئة فى التفكير لايدركها صاحبها وينتج عنها مشاعر سلبية من الغضب والقلق والذنب والحزن والضيق...الخ وهى أيضاً لايدركها صاحبها لكنها تكتشف أثناء الجلسات العلاجية ....يعنى مش واخد باله لا من أفكاره ولامن حقيقة مشاعره... لكن يبقى له ما سبق وذكرنا من أعراض الاكتئاب واللى بالتالى ما يعرفش هى جت منين.....حنلاقى حد يقول طيب ما كل ده بيحصل لى يبقى أنا عندى اكتئاب....حأقول له لأ....كل الأعراض دى بتحصل لنا من وقت للتانى لكن المهم فى كم الأعراض ومدى تأثيرها على الأداء الوظيفى والاجتماعى للإنسان يعنى ممكن تحصل الأعراض بس تكون بسيطة ومش مستمرة لمدة طويلة وباالتالى لاتؤثر على عملك أو دراستك أو علاقاتك الإجتماعية ومسئولياتك بوجه عام يعنى اللى بنمسيهاالتغيرات المزاجية من يوم ليوم...لكن استمرار الأعراض لمدة أسبوعين على الأقل مع تأثير واضح على كافة أوجه الحياة هو اللى يخلينا نقول لأ الموضوع محتاج تدخل فعلاً ومش المفروض ننتظر ونسيب نفسنا أو نسيب حد من أقاربنا أو أصدقائنا وهو فى الحالة دى من غير ما نساعده وننصحه بضرورة العلاج![](http://media.kenanaonline.com/photos/1238292/1238292579/large_1238292579.jpg?1358538887)
....طيب لما الواحد بيكون عنده اكتئاب إيه هى الحاجات اللى ممكن يحس بيها...؟الاكتئاب ده يصنف فى الطب النفسى على إنه اضطراب فى الحالة المزاجية لذلك المكتئب بيحس إن مزاجه ملخبط...مش فى المود....مش فى الفورمة....مالوش مزاج لحاجة..مش بينبسط من حاجة...ولا بيدور على حاجة تبسطه..غالباً بيجتر مشاعر الحزن ويدور على اللى يزود لخبطة المزاج...المهم علشان نقول نوبات اكتئاب عظمى زى ما قلنا يبقى الكلام ده لمدة مش أقل من أسبوعين وتكون مستمرة طول اليوم تقريباً....وكل يوم.. ساعات يبقى الموضوع فى شكل نظرة تشاؤمية تبقى ملازماك طول الوقت..حاسس إن مافيش فايدة....مافيش أمل فى أى حاجة.لخبطة المزاج هذه يصاحبها أيضاً مشاعر سلبية من الحزن والشعور بالذنب....تقعد كده تجتر مشاعر الذنب وكل ما يمكن أن يساعد على جلد الذات....أنا عملت كذا فى أهلى أنا عملت كذا فى فلان أنا ظالم ولادى أنا ..أنا.....وهكذا....كمان من الحاجات المزعجة المصاحبة للاكتئاب..مشاعر القلق الغير مبرر...خايف من الإقدام على أى شئ خوف بمناسبة وبدون مناسبة خوف عمال على بطال تصور لو جت عليك ساعة مش قلقان ممكن تقلق وتقول أنا قلقان لأنى مش عارف أنا ليه مش قلقان...وده لأن القلق هنا بيكون نتج عن فكرة تصنف على أنها فكرة مقتحمة لأنها تقتحم مسار التفكير الطبيعى وتكون فكرة طارئة خاطفة تمر على العقل بسرعة البرق ومن سخافتها يقوم العقل بعمل بلوك(غلق) فورى لها فتضيع ويتلاشى محتوى الفكرةولانتذكرها ولايبقى إلا ما صاحبها من مشاعر القلق والخوف فلايدرك صاحب الفكرة من أين أتت مشاعر الخوف؟
من مصاحبات الاكتئاب أيضاً الشعور بقلة القيمة وانعدام الكفاءة..وده مش معناها إنك قاعد طول الوقت تولول وتقول أنا قليل أنا ما أعرفش أعمل حاجة لكن ده يتضح كسلوك..بمعنى إنك تنسحب من المنافسة تنسحب من المهام الصعبة..ترفض على غير العادة تكليفك بمهام صعبة فى شغلك ...ممكن أصلاً تكون إنسان مش واثق من نفسك وممكن ضعف الثقة بالنفس يكون شئ عارض كعرض للاكتئاب ....المشكلة بقى إن ضعف الثقة بالنفس وانعدام الشعور بالقيمة ده بيتسبب فى مشكلات مع الأخرين...كل ما حد يختلف معاك فى الرأى تشوفه مش رافض رأيك لأ رافضك أنت كشخص..أو تاخد الموضوع بحساسية مفرطة على إنه مش محترم عقلك..ولذلك مش غريب ما نسميه بسوء تأويل الأحداث والمواقف فى الاكتئاب واللى بينتج من المزاج المنخفض والشعور الذاتى بنقص أو انعدام القيمة.....أى حاجة ممكن تفسرها " طبعاً ما أنا مش مهم بالنسبة لهم وما أفرقش معاهم فى حاجة).غير كده ..الاكتئاب كمان بيكون فيه مشكلات فى النوم إما إنك تنام كثير أو تعانى من الأرق وعدم القدرة على الدخول فى النوم بسهولة أو بتقلق باستمرار أو تنام بس حاسس إن مخك صاحى وتقوم من النوم وكأنك مانمتش...وكمان الشهية للأكل بتتغير والوزن إما بالزيادة أو النقص بشكل ملحوظ لك وللأخرين...بالإضافة للأعراض الجسمانية كالشعور بالتعب والإجهاد مع أقل مجهود وفقدان الرغبة الجنسية واضطراب ضربات القلب واضطرابات الهضم والصداع والشعور بضيق التنفس...![](http://media.kenanaonline.com/photos/1238292/1238292578/large_1238292578.jpg?1358538856)
أو أعراض الجسدنة..يعنى كل شوية تشتكى من حاجات وتلف على الدكاترة وعمال تعمل فحوصات وكله زى الفل الحمد لله بس أنت مصر تهرب من فكرة إنك مكتئب وتحول الموضوع على إنه مشاكل صحية وكله وهم طبعاً....دلوقت عايزة أقولك حاجة مهمة....لو حاسس بهبوط فى مستوى طاقتك الجسمانية والذهنية...لو حاسس بتغيير فى فى قدرتك على العمل والتواصل الاجتماعى...لو بدأت تحس إنك ما لكش نفس ولاعندك دافع للعمل أو دافع للبحث على أى نشاط ممتع...راجع نفسك وفكر..عندك إيه من اللى قلناه...ولو فى يوم عرفت إنك تعانى من الاكتئاب لازم تعرف إن فيه حاجات لازم نراجعها..طريقة تفكيرنا...ثقتنا بنفسنا...القدرة على توكيد الذات...وللحديث بقية بإذن الله.
د.نهلة نور الدين حافظ
أخصائى الطب النفسى
[email protected]
<!--<!--<!--
ساحة النقاش