صاحبت همى
بقلمى منصور ابو عبدالله
أنا باقى لى كم ضربه واطب
جراحى مدت ما نافع فيها طب
وكتافى نخت من الحمل والشيل
وقلبى عمران وبقول دايما يارب
*******************
الأيام قدر مكتوب وانا مكتوبى مر
وكل وجع صابنى بقول مسيره يمر
والجسم مش حامل خلاص الغلب
والصبر زهق منى و رافض يستمر
*********************
الاهه مع كل نفس منى طالعه
والحزن عندى كأنه كتاب مطالعه
والدمعه من كتر نزولها ممانعه
عايش حياتى حى بس مقسم مرابعه
***********************
صاحبت همى من كتر ما لازمنى
عايش بس والله العمر ما لزمنى
حكاوى الحزن بالقنطار ومحدش فاهمنى
الزمن اللى علطول بايعنى صدق ما يلزمنى
***********************
بقلمى منصور ابو عبدالله
صاحبت همى