طيب ساكت على نفسك ليه...
صحتك.. صحتك يا عم!
 

إنت لو كنت في دولة مسكينة من دول العالم الأول وحصل لك أي حاجة من الحاجات دي.. كان زمانهم طابّين عليك ومحاصرينك بكل الأجهزة الطبية المعروفة وغير المعروفة وعاملين لك "كونسلتو" حقيقي.. لأنك غالي عليهم.. بس ده فين؟ هناك في الدولة الوحشة دي!

في مصر.. طبعا الأمر مختلف.. أمال تبقى في مصر ازاي!
إنت هنا حر نفسك -مش بتقولوا عاوزين حرية؟!- تتعب أو تخف.. تعيش تموت براحتك.. حقك واللي إنت عاوزه اعمله!

وعشان كده لازم تخلّي بالك من صحتك مادامت الحكومة حابّة إنها تعلمك ازاي تعتمد على نفسك.. Help Your Self يعني!

لكن السؤال هنا
هو ازاي تعمل ده؟

في أوروبا والدول المتقدمة.. الحياة ماشية على خطين متوازيين
تأمين ورعاية صحية حكومية
ونظام صحي شخصي يلتزم به كل مواطن هناك
الجميل إننا –والحمد لله- ماعندناش لا ده ولا ده!
بس احنا مالناش دعوة بالخط الأول بتاع الحكومة ده

تعالى بقى للخط التاني

ازاي تعمل لنفسك "نمط حياة صحي"؟

بس قبل ما نحاول نجاوب على السؤال ده فيه سؤال تاني مهم..
هو ينفع أصلا الواحد في مصر يعمل لنفسه "نمط حياة صحي"؟!

سامعين القهقهة.. وآدي أكتر من واحد منكم بيقول:
"نمط صحي مين يا والدي.. هو احنا لاقيين ناكل أصلا!"
"نمط صحي ازاي وأنا أصلا باشتغل 24 ساعة في اليوم؟"
"هع هع هع.. نمط صحي.. مش لما أبقى أشتغل أصلا بعدها أبقى أخلي بالي من صحتي!"
"ده أنا باروح الجامعة الساعة 7 وبارجع البيت الساعة 6 بالليل.. طبعا مش قادر حتى أرفع إيدي.. تقول لي صحة؟.. في صحتك إنت بقى!"

احنا عارفين والله ومقدرين كل اللي بتقولوا عليه ده
واحنا برضه زيكم مافيش حد فينا يعني ببيقضي الصيف في جزر "الكاريبي" أو الشتا في "الأقصر"!
بنتشعلق في الأتوبيس وبنجري ورا الميكروباص وبيقفل باب المترو على صوابعنا!
بس برضه ده مايمنعش إنه يكون لك: "نمط حياة صحي"

الأمر بسيط ..
يعني إنت لو بصيت للي بتعمله في نفسك هتكتشف..

 إنك عايش في نمط صحي.. كارثة!

يعني بتاكل كام ساندوتيش طعمية على فول على.. على.. على..
وتحبسهم بسيجارة.. وشيشة تفاح..
وتقعد تلعب دور طاولة ياخد بتاع ساعتين..

وتقوم تروح تركب العربية الميكروباص اللي بتعدي من قدام القهوة وتنزلك بالظبط قدام بيتكم..
ولو تطول حد يشيلك على كتفه، ويطلع السلم كنت عملت!

يعني أكل وشيشة ودخان ومافيش حركة لسنتيمتر واحد!


مش بس كده..

ده ممكن تروح البيت تتخانق مع والدتك عشان مش عاوزة تسلفك خمسة جنيه..

وتكتشف إن بكره فيه امتحان في الجامعة.. فتتوتر.. وضغطك يرتفع لأنك طبعا مافتحتش الكتاب من أول السنة.. فتتنرفز..

وتدخل تنام وإنت في حالتك "الرائعة" دي.. ويا عالم بقى النهار هيطلع عليك ولا لأ!
 

دي مش عيشة سيادتك..
وإنت كده ماسك خناق في صحتك ونازل فيها ضرب..

الأمر أبسط من كده بكتير..
ومش محتاج إنه يكون عندك في بيتكم حمامات ساونا أو جاكوزي أو صالات جيمانيزيوم...
مش محتاج تقول لباباك ع الصبح إنك محتاج 45 ألف جنيه عشان تشترك في النادي الفلاني... "أصلي عاوز أحافظ على صحتي يا داد"!
مش محتاج إنت كل ده..

يعني يا سيدي وإنت رايح الكلية الصبح.. حاول تصحى بدري ربع ساعة بس.. وانزل من الأتوبيس قبل الكلية بمحطتين بس.. ومن هنا لغاية الكلية خدها جري! محرج... خدها مشي يا سيدي..

ولما ترجع بيتكم ماتاكلش الأكلة التقيلة بتاعة الست الحاجة وقبل حتى ما تغسل إيدك.. هووووووب تقوم رايح في سابع نومة.. ده سيادتك ممكن يجيب لك ضيق في التنفس مع باقة من أجمل الكوابيس وواحد من أحلى الكروش الموجودة في السوق!

كل ما تلاقي نفسك تحت ضغط شديد في الدراسة أو في البيت أو في الشغل.. فكها.. رحرحها.. خليك فريش يعني.. المشاكل صعبة وكتير احنا عارفين.. بس التوتر والشد العصبي عمره ما بيحلها..

خلّي في حياتك نمط صحي.. يحافظ عليك.. وعلى صحتك.. اللي هي رأس مالك دلوقت.. لأنك من غيرها صدقنا مش هتقدر تعمل أي حاجة..

احنا عارفين إن فيه معوقات كتير.. وإن البنات مثلا من الصعب يمارسوا الرياضة في الشوارع... بس ممكن يعملوها في البيت.. ضيق احنا عارفين.. بس بين السريرين ممكن تعملي كام تمرين ضغط كده وهتبقى زي الفل..
 

ويمكن إنتم نفسكم عندكم اقتراحات تانية..
وده اللي احنا مستنيينه

يعني اللي حاول يعمل لنفسه "نمط حياة صحي" معين ونجح فيه يقول لنا..
واللي حاول وفشل يقول لنا برضه أسباب الفشل دي..

مش جايز نقدر نعالجها مع بعض؟
دي صحتك.. صحتك.. يا سيد!