اللــي بنى مصــــر كان فى الأصــل حقانـــي

لا عمــره كان سلفــى ولا حتى إخوانـــــــي

ولا جــــده ليبـرالـــــي ولا أصله علمانــي

صاين حقـــوق الناس عارف حـدود ربــــــه

وولاده من بعـــده على منهجــه إتربــــــوا

كـــان حتى طوب الأرض يشهــد له و يحبــــه

لا لكرســى ولا منصـب ولا كان عمـره شهوانـــى

اللى بنى مصر كان في الأصل واد مجـــدع

يفهم في معنى الشرف لايخون ولا يخـــدع

ابن بلـد وجــدع وفــي الصـلا يخضــع

بإيديه رســـم سكته وحـط دستــــوره

شال البلد في عينيه خلـدها ف سطــــوره

لا اتغـــر واتكبر ولا علَّى يـوم ســورُه

ولناسه خَدُّه مداس وقلبه كــان مَخْــدَع

اللى بنى مصر كان عالِــــم وكان مشيــــد

يف الحق زى السيف وعشانه كان يحشــد

طيب مع المظلــوم ومع اللى ظلمه يشـــد
فلاح يحب الغيـط وفي ورشته أسطـــــــى

ولو سألته يقول أهى ماشية وألِسطــــــة

بينه وبين ربه ماكـــانش فيه واسطــــــــة

لا خليه وجمـــاعة ولا مُـــلا ولا مُرشِـــــد

اللى بنى مصر كان مربـــي وكان معلــــم

كانت ليه هيبة والكل بيسمعه لما يتكلــم

كان عزيز وله هدف مهما تعب مش بيتألـم

ولو شافته طلبته تحييه وتحفظله الجميــل

كان فعلاً مؤثر وله بصمـة في كـــل جيــــل

ولا كان يوم عمرة ذليل وللفلوس بيلملــــم

اللي بنى مصــر كان أصيل وفي خفـة دمـه سكــر

لا عمره بيخاف إلا من اللي خلقه ولا بيطاطي ولا يتأثر

ولمـا يشـوف البلد حالها ما اتعدلش بعد ما النظام فرفـر

لما يلاقي الحرية بتتكبت والعدالة مش بتتوجد والفساد بيتبرر

يهتف بأعلى صوته ويقولها من غير ما يتـردد أو حتـى يفكـر

يسقــط .. يسقــط .. حكـــم العسكـــــر !