أسباب الثوره و مراحلها

ثورة 1919 ماجاتش فجاءه بالصدفه فمصر كانت فى حالة غليان مكبوت من سنة 1882 بعد ما احتلها الانجليز و قضوا على ثورة احمد عرابى ، و لما ظهر الزعيم الكبير مصطفى كامل صحا فى المصريين الامل ، لكن اتوفى قبل الاوان فى عز شبابه فى سنة 1907 و هو بيكافح لاستقلال مصر و رفعة شأنها ، لكن ساب وراه افكار حره و تلاميذ و اتباع كان منهم محمد فريد و رجالة الحزب الوطنى اللى فضلوا يروجوا للعداله و الحريه.

اكتر الناس اللى كانوا بيفكروا فى ان سنة 1919 لازم تكون سنه فاصله فى تاريخ مصر كانوا اللى عاشوا فى الثوره العرابيه و شاركوا فيها و كان فى مقدمتهم الزعيم سعد زغلول.

وقت الحرب العالميه الاولى اتصرف الانجليز على انهم اسياد مصر اللى بيقررولها مصيرها فاعلنوا " الحمايه " عليها فى ديسمبر 1914 ، و بكل بساطه خلعوا الخديوى عباس حلمى التانى و حطوا مكانه السلطان حسين كامل ، و عملوا محاولات لفصل السودان عن مصر ، و استبدوا بالمصريين استبداد مهول ، فمنعوا الاجتماعات و فرضوا الاحكام العرفيه و عطلوا الجمعيه التشريعيه و حطوا رقابه على الجرانيل بطريقه ماكانتش بتسمح بكتابة حرف واحد من غير اذنهم و اتحكموا فى كل صغيره و كبيره فى مصر و هاجموا الارياف و خطفوا الرجاله و المحاصيل.

الفلاحين كانوا متغاظين من الانجليز اللى خطفوا رجالتهم و نهبوا محاصيلهم و قت الحرب العالميه الاولى و اتحكموا فى اسعار القطن من غير ما يهمهم خسارة الفلاحين المصريين ، و الموظفين كانوا مفروسين من الانجليز اللى حرموهم من الوظايف الكبيره و ماكانوش بيعينوا فيها غير الانجليز . الطبقات الفقيره انضمت طوالى للطبقه المتوسطه اللى اشعلت الثوره.

من الناحيه الاقتصاديه الثورة كانت ردة فعل ضد النظم الماليه و الاقتصاديه اللى كانت سايده فى مصر قبل الحرب العالميه الاولى و وقتها. فى الفتره دى المصالح الاجنبيه طغت على مصلحة الاقتصاد القومى المصرى بحماية و رعاية المحتلين ، فكان الشعب بيعانى من الاستعباد الاقتصادى جنب الإستعباد السياسى.

من الناحيه الاجتماعيه ، التعليم فى الفتره دى كان انتشر و الأفكار فى مصر اتطورت اكتر من زمان و حصل نوع من النهضه الادبيه و العلميه و الصحفيه على ايدين طبقه مثقفه بتابع التطور فى الغرب ، و كانت فيه نهضه نسويه بدإت تظهر مع انقشاع العصر العثمانلى. العوامل الاجتماعيه دى كان ليها اثر كبير على نمو الحركه الوطنيه و تطلع الناس للإستقلال و الملل من النظم الاستعماريه اللى بتقلل من الكرامه الانسانيه و حقوق البشر الطبيعيه.

الثوره بدت فى مارس 1919 بمظاهرات سلميه بيقودها الطلبه بتطوف فى شوارع القاهره و هى بتهتف بالإستقلال و سقوط الحمايه البريطانيه على مصر. فى الأول ماكانش واضح انها بداية ثوره و الناس افتكرتها مجرد مظاهرات وقتيه ، لكن المظاهرات استمرت و اتصدى ليها الانجليز و طخوا المتظاهرين بالنار و اتقتلت و اتجرحت اعداد من المصريين برصاص بنادق الانجليز ، لكن رغم كده المظاهرات ما اتوقفتش و فضلت تزيد ، و لما انضمت ليها طوايف الشعب و وصلت للأقاليم و الأرياف اتضح انها ثوره مش مجرد مظاهرات. ثوره شعبيه مش مدبره و لا منظمه و مالهاش قائد. بيقول المؤرخ عبد الرحمن الرافعى ان ثورة 1919 كانت اوسع مدى من الوفد و ماكانتش وليدة الوفد أو سعد زغلول لكن العكس هو الصح.

ممكن تقسيم مراحل الثوره الشعبيه على مرحلتين ، مرحلة شهر مارس و دى الثوره اللى قامت طوالى بعد نفى سعد زغلول و زمايله و دى كانت مرحله قصيره قاومتها السلطات العسكريه الانجليزيه بعنف جامد و اتميزت بمشاركة الفلاحين مشاركه فعليه و اتكونت فيها حكومات و طنيه مستقله فى زفتى و المنيا و غيرها. المرحله التانيه كانت طويله و بدت من ابريل 1919 و خرج منها الفلاحين خروج ايجابى و انحصرت الثوره فيها فى القاهره و المدن و انضم ليها اهالى المدن بكل طوايفهم ، طلبه و موظفين و محاميين و عمال ، الطلبه كانوا اول اللى فجروا الثوره فى مارس 1919. الطلبه دول كانوا طلبة المدارس و الأزهر و المعاهد الدينيه ، و فضلوا موجودين فيها على عكس الموظفين اللى دخلوها متأخرين و بطريقه محدوده ، و انتهى اضرابهم التانى بمجرد ما حذرهم اللنبى بالطرد اذا ما رجعوش لوظايفهم و من يوميها ما اضربوش تانى بعد ما اداهم محمد سعيد باشا فى وزارته الرابعه علاوات و ترقيات.