أسباب ضحك الاطفال 

ايه الحاجات الي ممكن تُضحك ؟!
هو انا بضحك ليه اصلا ؟!
هو ليه النكتة الي بتضحك مرة مش بتضحك تاني ؟!
واشمعني مشاهد الافلام الي بتضحك اكتر ؟! وكذا مرة مش واحدة !
تعالو نتخيل اني بعمل فقرة ترفيهية في مسرح وعايز اضحك الناس 
ممكن اعمل ايه ؟!
اتريء علي واحد ؟!
ابين نفسي عبيط ؟!
ابين اي حد عبيط ؟!

دايما لما تلاقي حد بيضحك تعرف انه بيضحك علي شخص اخر
حتي لو بتقول نكت .. اكتر نكت بتضحك علي اشخاص
نكت الصعايدة مثلا ! "مع احترامي ليهم"
هتلاقي اي نكتة فيها طرف احمق في الموضوع !

طب ليه بنضحك علي بعض
في قناعاتنا الانسانية اننا عايزين نبقي اكمل عشان نحس بسعادة اكبر
لما انا احس ان انسان اكمل مني بحاول اسبقه واوصل بنفسي ليه
مثلا مين ميبقاش نفسه يبقي زي بيل جيتس .. البرت اينشتاين

بتبص ع الي اعلي منك عشان تحس بطموح 
وبتبص ع الي اقل عشان تحس برضي وفرح .. "تحس انك سابقهم"
وهنتكلم عن ده بالتفصيل

تخيل انك في سباق وفجاه ورا لقيت اول واحد قريب منك ع بعد 2 كيلو
تخيل واندمج هتلاقي نفسك بتضحك بشكل هستيري من كتر الفرح
واحساس انك سبقته
كلنا كدا
بنضحك علي بعض ساعات عشان بنبقي عايزين نحس اننا سبقنا
مشكلة السباق دا ان ترتيباته مش علنية ترتيباته معنوية جوه كل واحد

انت بتضحك بس عشان بتحس انك اعلي ..او عايز تبقي اعلي
عرفت ليه كثرة الضحك تميت القلب ؟!
رايي ان موت القلب هنا تعني الجفاء وعدم الرحمة !
قلبك هيموت لدرجة انك كل ما تتمادي هتضحك علي طبقة اقل 

بس ليه مش بنضحك علي ناس بيوتها اتحرقت مثلا ؟!
لما نرجع لتخيل السباق هنلاقي لما واحد وراك يموت هتزعل
انت عايز تكسبه مش تموته ..مهما كان عاطفتك كانسان موجودة

طب امتي اول ضحكة للطفل ؟!
لما نعمل نفسنا هبل قدامه !!
هل دا شيء غريزي ؟!

طيب مادام كدا ليه ممكن تلاعب عيل وتخليه يكسبك وتفرح لفرحه ؟!
انت عارف ان الطفل دا مهما علي مش هيجيبك
غير كدا العاطفة بتحكم بين القرايب والاخوات والعلاقات الي قايمة
علي الشفقة
مواليد برج الثور مثلا ممكن يضحكو علي واحد وقع
بس لو اخوهم وقع ميضحكوش