الخميرة

اضافة الخميرة واستعمالها فى مجال الدواجن
نزلنا بوستات كتير عن الخميرة وفوايدها وجرعاتها اللى تتراوح من 2 جرام على اللتر الى 7 جرام على اللتر

وقلنا ان كمنشط نمو لة جرعة 2 جرام على اللتر
وعلشان الترييش والوزن بيضاف بجرعة 5 جرام على اللتر او 5 ك على الطن 
وعلشان يبنى مستقبلات جهاز هضمى جيدة وزيادة للبكتيريا النافعة فى الامعاء يضاف ب 3 جرام على اللتر او 3 كيلو على الطن
وعلشان نعجل من بناء بطانة الامعاء خاصة فى العمر الاول بيضاف بجرعة 6 جرام على اللتر او 6 كيلو للطن
وعلشان يشتغل على المناعة ونستفيد من جدار خلية الخميرة وما بها من منان اوليجوسكاريدات
يضاف ب8 جرام على اللتر او 8 ك على الطن
وعلشان يشتغل ولتخفيف السموم ويقلب اى مضاد سموم كيميائى الى مضاد بيولوجى بيضاف 10 جرام على اللتر او 10 ك على الطن
ودا كان بوست مخصوص فية كل الكلام د

وقلنا فى اخر البوست ان اقوى فايدة للخميرة وعلشان تاخد المميزات دى لازم اضافة على العلف
لان شغل المية بالنسبة للخميرة لة عيوب كتيرة

طيب تعالى نشوف لية الناس بتشتكى لما بتستعمل الخميرة بجرعة اعلى من 3 جرام على اللتر 
اولا بيظهر سيولة فى الزرق
 بيظهر اسهال بنى 
 بيظهر زرق مائى مخلوط برغاوى

لية كل دا
مع ان استهلاك العلف كويس والنمو ماشى كويس
لان الخميرة علشان تعرف انها جيدة وغير مغشوشة لازم تعمل التفاعلات دى بالامعاء لانها بتعمل تخمرات مع البكتيريا المعوية النافعة وبتسبب ليونة الزرق دى والرغاوى او الفقاقيع الموجودة فى الزرق اللى بيعتقد الناس انها كولستريديا
لاكن دا طبيعى مع استعمال الخميرة وانها جيدة كمان
عاوز تعرف الخميرة كويسة ولا مغشوشة وهل بتؤدى الدور بتاعها ولا ضعيفة
ضيفها مع عسل اسود
هتلاقى تفاعلات بينهم على هيئة فقاقيع اعلى المية بتاعة السقاية وان مستوى المية زاد شوية
دليل على عملية التخمر فى وجود مادة سكرية
طيب علشان تعرف ان اللى عندك دا طبيعى مش كولستريدي

شيل الخميرة 48 ساعة
هتلاقى الزرق بدا يرجع لطبيعتة الغير لينة وقل البنى والفقايع فية
ودا دليل على الكتمال جدار الامعاء اللى بيساعد فى زيادة الوزن عن طريق تحسين الهضم والامتصاص
اما لو المشاكل بتاعة الزرق دى والوانة المختلفة دى بتحصل مع نافق عالى او انتفاش فى ريش الرقبة وبداية الاسهال المدمم فدا معناة ان كان عندك حضانة للكوكسيديا او الاوؤسيست وفى الحالة دى الوزن هيقل عندك يعنى فى الحالة دى شيل الخميرة وعالج الكوكسيديا وجرعة كولستريا معاها وكمل الخميرة عادى .

تابعنا على صفحتنا على فيس بوك

آل سلام لتعبئه المواد الغذائيه ودواجن التسمين

 

 بعدها

بل ان الخميرة فى الحالة دى هى اللى بتعرفك هل الكوكسيديا اتعالجت صح ولا لسة موجودة

خلاصة القول
ان استعمال الخميرة فى العلف افضل بمراحل من المية
زيادة الجرعة وما يتبعها من اسهالات وليونة فى الزرق دا طبيعى 
ان الخميرة مش ليها جرعة واحدة لان مش ليها فايدة واحدة

ملحوظة اخيرة للاخوة اللى بيشتغلوا بيها كمنشط نمو و بروبيوتيك
لا تستعمل بعدها او بالتبادل معاها اى مضاد حيوى معوى لانة بيضيع اللى هى عملتة

اتمنى يكون البوست افاد البعض وازال اللبس ودا هيبان من الردود
اللهم اجعل عملنا هذا خالص لوجهك الكريم
مع تحياتى وشكرا
مهندس عاطف عبد الدايم

يسمح بتداول النشر والطبع مع ذكر المصدر