كل يوم معنى ...
دى رسالة هاكتبها لك كل يوم ... أقرأها .... تأملها ... وأكتبلى ردك.
رسالة النهارده بعنوان ...... 
حافظ مش فاهم 
اتفقت شركة الكهرباء مع ثلاثة عمال لمد كابلات كهربا فى طريق ما ، فوزع العمال العمل بينهم كالتالى واحد يحفر وأخر يضع كبل الكهربا والثالث يردم ، وفى يوم تغيبعن العمل من يضع الكبل فما كان من العاملين الا انهما استمرا فى العمل بكل اصرار وايجابية " واحد يحفر والتانى يردم " 

.....
كتير من افكارنا ومعتقداتنا الحياتية محتاجة تتراجع ؟
ليه الشوكة فى الشمال مش اليمين ؟
ليه مينفعش أكل بايدى فى اى مطعم وبأكل بأيدى فى كنتاكى ؟
ليه الساعة فى الشمال ؟
ليه مينفعش اشتغل مندوب مبيعات ؟ 
ليه البنت الكبيرة تتجوز الاول ؟
ليه لازم الشبكة تكون ب 25 الف جنيه علشان تليق ببنتنا ؟ هو ايه الاهم الشبكة ولا اخلاقه ؟
ليه لما بهش الدبان بقول هسشششش ؟ 
ليه لازم اشرب الصبح شاى بلبن ؟
ليه لازم أكل اللحمة قبل الخضار ؟ ليه اصلاً لازم أكل لحمة ؟
ليه اللبن بعد السمك يجنن ؟
اسأل نفسك ؟ مين قال كده ؟ وهل هو قدوة بالنسبة لي ؟ وهل على ان التزم بما قاله ؟ كيف أتأكد من صحة ما قال ؟ ايه اللى هيحصل لو معملتش ؟ هل ده يناسبنى ، هل انا مقتنع ..... 
ده مش معناه ترفض وخلاص او توافق وخلاص ، معناه فكر ... فكر ... فكر ؟ ...... إيهاب ماجد
قولى ايه تانى انت بتعمله وانت حافظ مش فاهم ؟