**  قصيدة ..

قالت لى   : جميل شعرك ..

قلت لها    : تسلم إيديكى .

قالت لى   : إنت اللى قلته .

قلت لها    : قلته ف عينيكى .

                بكلام يشاور عليكى ..

                ويزيد من الشوق رصيدك ..

                حروفه, يغزلها رمشك ..

                تصبح جفونك قصيدة ..

                سطورها, بتلف جيدك .!

                مقامها يشبه مقامك ..

                أمّا القوافي عبيدك .!

                عينيكى , بحرها الواصل ..

                ما بين وريدى , لوريدك .!

قالت لى   :  قول لى كمان ..

قلت لها    : حاضر ' أزيدك .

                فى كل يوم رح تلاقى ..

                قصيدة تانية ف بريدك ..

                لاجل ما تتأكّدى ..

                إنّى فعلا باريدك ..

                وإنّ ده مش بخطرى ..

                ده الحبّ ' سيدى, و سيدك .

                وإنّ عيدى ' امّا ترضى ..

                 يا هلترى ' أنا هابقى عيدك .?

صبري على