**ع البحر ..

(1) - ع البحر ' قاعد منتظر ..

أشوف خياله ..

ياما طبعنا .. رجلينا داخل ..

صفحة رماله ..

يقول لي : "نمشى" ..

أمشى قباله ..

يقول لى : " نجرى" ..

أقول : " وماله "..

كتبت إسمه ..

رسمت رسمه ..

على رملة بيضا ..

محتار ما بين ' نورها, وجماله .

(2) - وكلّ موجة ' ويّاها ذكرى ..

ورا كل حبة رمل ' فكرة .!

وكلّ نسمة جايبة لى طيفه ..

أسمع نداه, وكمان باشوفه .!

وبتشتهجّى بحنان' حروفه ..

بتقول لى " سامحه " ..

" فاكر ملامحه " .?

دا كان حبيبك ..

إوعى انت تكره .?

(3) - دلوقت قاعد ع البحر وحدى ..

وباشتكى له همّى , ووجدى ..

وباسأله ' -لو شاف حبيبى -..

بشويش عليه, ويسأله ..

عامل إيه الجميل فى بعدى .?

فى المغربية ' ع الرّمل ماشى ..

أطبع قدم , والموج يشيلها .!

أصرخ ألم , والبحر يسأل ..

كان فيه كمان قدم مشى لها .!

(4) - كتبت إسمه ' رسمت رسمه ..

على رملة بيضا ..

وشوشت ودعة ' قلت لها جدعة ..

لو توصلى له , وتوصّلى له ..

إنى قاعد منتظر ..

أشوف خياله .