"أقدار الله مُبطنّه بالرحمات، ولكنكم قومٌ تستعجلون"

صحيت مرة متأخر عن ميعادي اللي بنزل فيه للشغل
قومت دخلت الحمام بسرعة وصليت الضحي ولبست ونزلت من شقتنا بسرعة
ولما وصلت عند باب العمارة الرئيسي بحط إيدي في جيبي وفي شنطتي ملقتش مفاتيحي!!
اتضايقت جدًا واتعصبت .. هو انا لسه هطلع تاني وأدور عليها؟؟!!
ولسه هصحّي ماما عشان تفتحلي، ومتضايق جدًا إني هصحيها وأقلقها
وياتري هتصحي بسرعة أصلاً ولا لأ .. كل ده بيدور في دماغي وأنا أصلاً متأخر!!!

فطلعت تاني وانا طالع اتصلت بماما علي التليفون وقولتلها تفتحلي الباب عشان نسيت مفاتيحي
أول ما طلعت لاقيتها فاتحة باب الشقة ومستنياني
فدخلت ادور علي المفاتيح وانا متنرفز ومش طايقني شخصيًا
ولاقتها الحمد لله 
بس كنت لسه متضايق وعمال أنفخ ومش طايق نفسي عشان التأخير
خدت شنطتي بعصبية وأنا نازل ماما قالتلي هدي نفسك يا حبيبي 
وقامت دعتلي "ربنا يصلح حالك ويسهلك طريقك ويوفقك ويرزقك من حيث لا تحتسب"
وقالت: إنت عارف؟ .. إنت نسيت المفاتيح عشان خاطر الدعوتين دول، متخفش ربنا هيسهلهالك.

وسبحان الله علي غير العادة، الطريق كان مُيسر وسهل جدًا، ووصلت متأخر عن ميعادي 15 دقيقة بس رغم اني كنت متوقع ازيد من نص ساعة، والحمد لله محصلش اي مشاكل.

الشاهد من الحكاية إن ربنا سبحانه وتعالي بيقدّر كل شئ بعلمه وقدرته
وعقلنا مهما وصلت نسبة ذكائه له حدود ومش ممكن يُدرك لطف الله في مُقدراته
وزي مانا اتأخرت عشان اسمع الدعوتين الحلوين من ست الحبايب
ربما في تأخر حدوث أي شئ في حياتنا رحمة
أو حدوث أي شئ خارج إرادتنا وعلي غير رغبتنا يكون لمكافئتنا بأفضل منه ومنع أذي عننا

الرضا بالحال والرضا بقضاء الله وقدره خيره وشره بيملي النفس طمأنينة غير عادية، و التوكل علي الله وحسن الظن فيه بإن كل اللي بيحصل ده فيه خير ضروري هيكون فيه خير لينا 
وربنا هيراضينا علي صبرنا واحتسابنا الأجر ده هو الكريم سبحانه وتعالي.

"أقدار الله مُبطنّه بالرحمات، ولكنكم قومٌ تستعجلون"


محمود حسني