دبــابيـس سيـاســية

 بقلـم : لــواء أمـيــن منصور

كاتب وباحث :  وعضو منظمة الكتاب الأفريقيين والأسيويين بالقـاهــــرة

هي الانتخابات دى كده

رأى خالتي ستوتة في انتخابات مجلس شعب المحروسة

خالتي ستوتة صاحبة الحكمة المشهورة اللي بتقول لي يا فيلسوف عصرك وأوانك " اللي تعرفه أحسن من اللي ماتعرفهوش " ضحكت من الغيظ وكظمت غيظي من منطلق والكاظمين الغيظ والعافين عن الناس .قلت لخالتي ستوتة بصراحة وبكل صراحة مالقيتش في كلامك راحة لأنني أريد رأيك يا خالتي ستوتة فى انتخابات مجلس الشعب قالت لي تريد الحق والحق أقول : انتخابات سمك لبن تمر هندي انتخابات لا تسر عدو ولا حبيب وكلها لخبطة وشخابيط  واختلط الحابل بالنابل وكله عند العرب قرنبيط : ضحكت مع أنني لم يكن لي نفس للضحك وقلت لها مالنا نحن يا خالتى ستوتة ومال القرنبيط ؟ قالت لي هو أنت يا فيلسوف عبيط ! قلت لها : ما علاقة القرنبيط بانتخابات مجلس شعب أصحاب البرانيط ؟ قالت لي : اسم الله عليك يا صاحب الفرقليط نعم هناك علاقة الأب بالوليد وأسأل عمك إبراهيم الغبيط اللي تحزم ومسك العصيا ورقص خمسة بلدي وأم إلهنا تزغرد وتهلل وتصفق مع أهل الحتة من أصحاب الزفة طيت طيت وانقسم الناس والأهل والأحبة والأصدقاء والأصحاب وأصبحوا فرق بين مؤيد ومعارض للمرشح صاحب الملايين بالزغاريد . أصل الناس غلابة ومساكين والفقر يا أبنى يسوى الهوايل ويخلى الجاهل على الكرسي تحت القبة يتمايل فهمت يا فيلسوف عصرك وأوانك علاقة الانتخابات بالقرنبيط !

مصمصت شفايفى وتنهدت وقلت لها : عجايب هو فعلاً كان فيه انتخابات ولاّ كانت بروفة لدخول مسرحية الانتخابات .........ألخ !!

صوتت خالتي ستوتة وقامت مفزوعة وقالت لي : أسكت يا أبن المجنونة وخلينا في انتخابات مجلس شعب المحروسة قلت لها : ماشى يا خالتي ستوتة قالت : اسمع يا أبنى سأقول لك الخلاصة متشفية ليس فيها دهن ولا عظم ولا مطبوخة بالملوخية هتاخد بنصيحتي قلت لها " هاتى ما عندك يا ستوتة قالت : شوف شغلك وراعى أكل عيشك وأولادك ومالكش دعوة بالانتخابات علشان يا ابني اللعبة خطيرة وملعوبه ومكشوفة قلت لها : مش فاهم يا خالتي ستوتة قالت أنت ناوي تتعبني وأنا عند كده خلصت الحدوتة قلت لها : مش فاهم ولابد أن أعرف ما هي أصل الحدوتة ! قالت لي : أنت ذكى وفاهم وعارف قواعد اللعبة المرصوصة والموضوعة والمتفصلة تفصيل محبوك حبكة ترزي المحروسة قلت لها : يعنى تقصدي أن هو كده ومافيش غير كده وبلاش تتكلم كده يعنى لم ولن يكون غير كده وبصراحة كده إحنا مجرد كمبارس كده نهلل ونزغرد كده علشان البهوات اللي كده يروحوا مجلس الشعب كده والناس تعمل مشاكل مع بعضها كده والبيه عضو مجلس الشعب جالس في المجلس كده ولو فيه مصالح تتعمل كده واللي مش عجبه يخبط دماغه في الحيطة كده علشان الكثير منهم نجح في المجلس كده وبالفلوس اللي توزعت كده أصل شعبنا طيب وغلبان ومسكين كده واللي مش عجبه يشرب من البحر كده ده لو وجد ماء يشرب منه كده أصل الميةّ مخلوطة بالمجارى كده والناس ماتعرفش تقول أو تعبر عن رأيهم غير كده وبالعربي الفصيح الأحوال الموجودة هي كده ولن تكون غير كده وأنت يا فيلسوف الغبرة لن تستطيع أن تعدل الميلة كده وأبقى قابلني لو اتعدلت برضة كده ما هو كراسي المجلس محجوزة لأفراد معينة كده وأحلف على مصحف لو أنت فاهم كده لأني يا أبنى مش فاهمة غير كده وأنتم يا أهل مصر المحروسة لو فاهمين حاجة غير كده من فضلكم راسلوني على عنواني اللالكترونى كده بس أقول لكم والله العظيم الليل مهما يطول كده الشمس بتشرق كده ولا يمكن تكون غير كده والإدارية العليا بتقول كده ومجلس الشعب بيقول أنه سيد قراره كده وهل سيوجد حل كده للمسألة المعضلة كده والله لم ولن تحل كده ولا كده لأن الوضع سيستمر كده وعلى المتضرر اللجوء إلى الغيظ والنرفزة كده وهو اللي سيصاب بالسكر والضغط وسيموت كده والناعي سينعى البقاء والدوام لله مات فلان الفلاني كمداً كده وأصبح في طي النسيان كده وفى النهاية أقول لكم السلام عليكم كده وأنتي يا خالتي ستوتة الجو برد وزعابيب وخايف عليكى كده فأنصحك أن تشدي اللحاف وتنامي كده وأنا سوف أخذ بنصيحتك وأشرب اللبن وأنام بدري كده وأتفرج على مباريات الدوري كده وبلاش دوشة دماغ كده واللي عنده حل يا محترمين يقدمه لبرنامج كده وسيفوز بجائزة مافيش أحسن من كده وإلى اللقاء يا سادة يا....كده مع أمل اللقاء بكم في انتخابات قادمة هتكون بنفس الشكل ده كده فهمتم حاجة كده ولا كده باين عليكم ما فهمتوا خالص كده

ولمزيد من التفاصيل يرجى التداخل على العنوان التالي : [email protected]